Wided Zidi - وداد الزيدي

مخنوقه و منجمش نتكلم و على حال بلادي نتألم رجال بلادي الأحرار تموت و تتحط في تابوت و الحكومة منسمعولها حتى صوت هانا معتصمين و ماناش ساكتين لين تسقط حكومة الفاشلين و يتعاقبو المجرمين ما عناش شكون أغلى من أولادنا سيب كرسي العرش و جيبلنا قتال الجيش بسكوتنا متحلمش الثمانية إلي تغدرو و تذبحو دمهم ميمشيش خساره

و بش يتشدو الغداره واحد يجري على دار و الثاني مازال كي فرح بالصغار و لاخر عرسو مازالو نهار الأم تقول أذاكا إلي خرجت بيه مالدنيا و تهنيت كي شد الثنيه جاني خبرو و الدنيا دارت بيا على خاطر تراب تونس مشا ضحيه ولدي مات شهيد لعزيز عليا غدروه يعدموهم و شويه ربي يخلص الحقوق وحدو إلي عالم بيا

تخنقت و فاضت في عيني الدموع كل شي في هالدنيا ممنوع في كل ثنيه تلقى واحد مفجوع خايف لا يموت بالجوع و يفقد العزاز عليه من غير رجوع يعدي حياتو موجوع يستنى في الناس تخدمو ميحبش يمد يدو عباد تضرب في الملاين و عباد بطاله بالملاين يجري على لقمة الصغار مستعد يخدم حتى حفار خدمة النهار ما فيها عار المهم يبني لعايلتو دار ميخليهمش مطيشين في الشارع الدنيا شاعله فيها النار و هو توحش يمشي لالخضار و يعمل طله عالجزار و يقضي قضية مالعطار زعما يجي نهار و يرتاح و تطلع عليه شمس الصباح زعما يلقا خدمه تجيب الأرباح و يتوكل على ربي و يقول يا فتاح

تعب و غلب كل ليله يبات جيعان بردان و عطشان أما ديما يضحك و يبين إلي هو فرحان يحمد في ربي علي عطاه و حاسس إلي بش يجي النهار إلي يتمناه و ولدو إلي حرق بش يلقاه .. قلبو معبي و ديما يخبي و يحمد ربي باقي خير من غيرو تو ربي يعطي خيرو ..  في تونس الزوالي ديما اللتالي و البرجوازية في العلالي .. فى تونس ناس على حالها باكية و ناس راقية و تاكل فى الروز بالفاكية