شبيك متخبية ؟ في بالك إلي الحشمة زايدة فيك الشطر ؟ تي أخزرلي.. عبرني ... أنا نعرفك عاقلة و ما نعرف بلاصتك كان انا, نعرفك روحك عزيزة و ما ترضاش بلي يجي .. بش تقعد برشة مشيحتلي ريقي ؟ شبيك خايفة ؟

كيف ما ريتك في منامي لقيتك .. مسرارة و حشامة و ما مسك قبلي حد .. بش تقعد برشة ساكتة ؟ باهي تخليني نبوسك ؟ تي خليني حتى نمسك .. تعرف كان موش إنت راهو ما فماش زين ؟ كان موش إنت راهو ما فما حتى راجل حنين ؟ تضحك ؟ ما أحلى تبسيمتك, باهي قلي اش سماك ربي ؟

ما نمشي إلا ما تجاوبني, انا قدامك نولي كيف الطالب الركيك و ما نعتقك إلا ما تهزلي صانتي من سفساريك .. ما يطلع اسمك كان قمر, ولا نقلك ؟ حتى القمر من الغيرة بات عالجمر .. شي ؟ شادة صحيح في لا ؟ حلمت بيك بين نومين, هزيت النفس و من زينك ما نجمتش نهبطو

لا عرفتك لا إنس لا جن, يا نمسك يا نجن, هوني صابر لا نكل لا نمل .. بش نهبل, نحط القهوة و السيجارو و نبدى نتخيل فيك, زعمة وين متصدرة .. أما انا توا لقيتك و مانيش مسلم فيك .. يا نبوسك يا ... نبوسك ! و إنت إختار .. عمري ما عشقت قبلك أما سحرتني كان إنت يا … إنت !!! والعشق لا يجي لا عالخاطر و لا عالبال ... بالظبط كيف ما عشقتك إنت يا ... بوسة الخال