حبات دبات للكتاب مشات انشد ميمتها اش هيات و خبات..

بنتي كبرت و غدوة تولي للات البنات.. نكسي و نلبس نخبي و نكدس.. نستنى بنتي وقتاش تولي صبية و تعرس.. بنتي حليلتها.. زينة و مڤدية..حاذقة  و بالالوف مشريّة.. ماللي صغيرة و انا نبرمج و نسطر باش في حياتها تمشي ما تعثر.. نخرجها نظيفة و مرتوبة باش في عينيهم نظهر قافزة و هي في قلوبهم تولي محبوبة.. مش مهم لبستها تعجبها.. المهم كيف يراوها يقولوا ماضخمها..

قريت و وريت و بالعصا في ظهرها وقفت و جريت.. مش مهم هي بروحها و قرايتها فرحانة.. المهم هوما يقولو ملا ثقافة و ملا فيانة.. ماشية و تحلىو بلاصتها تزيد تعلى.. تغرمت بالبحر و الخروج و بدات تحكي عالسهر.. هذا الكل ما يلزمنيش.. و ما يهمنيش..

في صغري شبعت بيه و حياتي لونتها بيه.. اما هي ما لازمش تخمم فيه..اش يقولوا عليا الناس لوكان يراوها تعمل فيه؟!! بنتي رزينة و تسمع كلامي و عينيها ما تهزهمش قدامي.. من صغرتها مغرومة بالموزيكا و الغناء.. صوتها الحقيقة متع ربي حلو اما هالحكاية لازمها تموت هنا.. شكون قال صوتها يهبل؟؟! بلا هزان و نفضان!! تو موش قرايتها ابجل؟؟! الناس في راحة ما تخلينيش و الحمدالله بنتي ما تغششنيش و وين نوقفها تاقف و ما تفوتنيش...! تعدات الايامات و وصلت للباك و الشهادة خذات... العاقبة للشهادة الكبيرة تفرحني بيها و موش مشكل كان حسدوني عليها...برا نقولوا غيرة..

في صغري حلمت حلمات كبار مخلين لتوا في مخي آثار... بنتي تحققهملي و وقتها الناس يقولوا عليا عملت آفار.. موش مهم هي اش تختار... المهم انا نرا مناماتي قدامي و الناس يقولوا عرفت تختار...!

في نهار قالتلي نحلم بروحي مهندسة نسطر و نصور .. نلبس كاسك و من شانطي لشانطي نتفقد فالديار... اش يقولو عليا الناس؟! مسيبة بنتها في وسط الرجال قال شنوا خدمتها اللي بش تصور منها المال؟؟! و زيد هي ماخيش متع هالشي... ما تنجموش.. ياخي هي راجل؟؟! ماهي طفلة و اللي نقولهولها ما تعكسوش!! بنتي ما تصلح كان في بيرو.. و ما تحكي شي و ما تقول شي و ما تعرف شي باش الناس يقولوا هالقلب ماغرق بيرو...! قالتلي نحب نولي نولد النساء...

كل نهار نشوف بين يديا حياة جديدة هبطت للارض بأمر من سابع سماء...! و فاش قام عليها هالشي الكل؟؟! وجايع و دمومات و صغير حيا و صغير مات.. اللي يدعي بالخير و اللي يقول الحسيب ربي فاللي ربات؟؟!! لا لا و زيد شيقولوا عليا عمامي و خوالي كيف تروحلي مالڤارد عقابات الليالي.. ؟! و اش يقولو الناس لوكان بخزرة هكا و الا هكا خزرلك الطبيب و الا الفرملي و الا العساس؟! في صغري كنت نلم الصغيرات نقريهم و نعمل روحي استاذة عليهم.. و اليوم بنتي ولات استاذة و فكرتني بصغري و بيهم.. بنت خالها ولات تقري فالجامعة.. و انا شخاصصني باش بنتي ما توليش كيف النجمة في عيني لامعة؟! مش مهم هي حبت و الا ما حبتش.. المهم الناس فيا ما تشمتش...

بنتي باهية و طول عمرها في كلامي تسمع و في روحها لاهية ... لا خلطة لا اصحاب لا شغبة و لا حد يدق عليها الباب.. بيها قدام الناس راسي مرفوع و قدري مهاب.. وقيت بش نختارلها اللي يهنيني و يعبيلي عيني و قدام الناس يعليني.. مش مهم هي فرحانة المهم انا مطمانة.. و حياتها اللي سطرتهالها بالقلم و الورقة مشات كيف ما نحب انا و اللي نعمل نلقى...

و مع هذا الكل مانعرفش علاش كيف تبكي تهبط دموعها بحرقة  .. و اليوم بعد اربعبن سنة بنتي مزالت في حضني اما راني ما نعرفهاش.. هايمة عالارض و عينيها ما تهزهاش.. كلامي ما تسمعوش اما اللي نقولو ما تعكسوش.. خزرتها فارغة و دقة قلبها فارغة و ضحكتها برغم الرنة اللي فيها هي زادة فارغة.. بنتي ويني؟! حسها ما فماش...ساكتة و عالدنيا مسكرة وذنيها ...و حتى مالناس ديما ينشدوني عليها...! تبركالله عليك عرفت اش تخرج من بين يديك.. اما وقتاش بنتك باش تفرح بيها و تعرس؟!