على غير عادتها قامت، تاعبة مزالت تحب ترقد أما تحب تقوم و تعرف شنوا يستنى فيها اليوم.. غسلت وجهها لبست روبتها لقصيرة الكحلة، ما عملتش مكياج، حبت تعرف روحها في عينين العباد..

خلات فرشها مفرعس أما مش مهم هذي حاجة معروفة، نسات ما فطرتش. مش مهم زادا بطبيعتها معادتش تاكل كيف قبل و ولات تبدا نهارها بقهوة كحلة و سيجارو.. تمشي في الطريق و تثبت في عينين الناس، يخزرولها.. يثبتو فيها.. يشوفو لساقيها المكشوفة.. عينيها بلاش مكياج.. وجهها شاحب.. شعرها داخل بعضو.. زعما شبيها؟؟

هي زادا متعرفش.. وصلت لقهوة العادة، قعدت، طلبت إكسبراس، شعلت سيجارو، جبدتت تلفونها و حلت فيسبوك، تشوف شفما جديد.. عينيها في التلفون و تحرق في الدخان، ترتاح كي تتكيف و تزيد تنقص من عمرها دقيقة مع كل سيجارو.. جابلها سرفور قهوتها وقعد يشوفلها على جنب، معاها زوز طوابع سكر، تحبها مرة.. كيف حياتها، كيف أيامها، كيف سعدها، كيف كل يوم تعديه وحدها بين العباد.. خرجت مرايا من صاكها، عينيها تحلت في وجهها.. شبيني هكا..!! مش هكا أزين..!! علاش اليوم بالذات..!! ساكتة في الظاهر أما في وسطها حرب، نار تشعل.. يدها ترعش، طفات سيجارو و شعلت آخر، تشوف لشفايفها في المرايا والدخان خارج بيناتهم.. ياخي كان على الطفلة عيب؟ شبيهم يخزرولي؟ كان أنا نتكيف؟ كان أنا وحدي؟ أخطوني، فكوني، كرهتكم و كرهت العيشة معاكم.

نقعد وحدي ولا نقعد مع راجل يحكم عليا بش نبطل الدخان، أففف كلاوني بعينيهم.. آآآه تفكرت، الروبة قصيرة..

شمدخلكم فيا شنلبس؟ بش تقولو عليا مش متربية؟ أنا نعرف روحي شنوا.. خليهم يشوفو مدام داهم في غريزتهم، جواعة يحبو ياكلو، ذيوبا يحبو يفترسو، يشوفو للمرا صدر و فخاذ و و و .. نساو الأهم، نساو خزرة عينيها، نساو معزة ضحكتها، نساو بلاصتها بيناتهم، نساو أمهم و أختهم و خالتهم و عمهتهم و بنت عمتهم، شبيهم أذوكا مهمش إناث!! معندهمش لي عندي!! ولا خاطرهم أقارب.. نقهركم و منخلي حد يلمسني، مخاخكم فارغة، مخاخكم ما تخممش، ما تحسو كان بالنشوة وانت غارق معاها على الفرش، ما تفهموش خزرة المرا، متعرفوش علاش تخرج مغير مكياج، متتحبوش و متخلوهاش تحبكم..

كملت قهوتها و ملات روريها بالدخان، خرجت و بدات تمشي في شارع وحدها، تعد في خطوتها، واحد، ثنين، ثلاثة، أربعة، خمسة، ستة، سبعة، ثمنية، تسعة، عشرة.. عشرة.. ملي عمري عشرة سنين بديت نعرف و نتعلم، نشوف في صاحبتي تحمر بالسرقة على أمها و كي نخرج معاها تقابل صاحبها و تاخولي شكلاطة باش ما نعاودش لامي، نسمعها و هي تحكي في تلفون، متفدش، ما تتعبش، ما تقلقش، أما توا عندها برشا معادش تحكي، أكيد كذب عليها، كمل منها، لقا غيرها، حب غيرها و لعب لعبتو كلعادة..

عشرة سنين ملي كنت عمري عشرة سنين، بكيت، فرحت، تظربت، تجرحت، تعلمت، قسيت علي دايرين بيا، تسبيت في الشارع و سمع وسخ وذنيا في جرة لبستي و خاطر زادا ماكنتش نسمعهم أصلا، مجتمع ذكوري، فارغ ملرجال.. عشرة سنين ماتو فيهم برشا عروق في بدني، عشرة عروق، كل عرق و حكايتو، و همو و مصيبتو..

نحات صندالها، تمشي حفيانة، تشوف للسماء، تحب تصيح، تحب تبعد، تحب تحيا من موتها، تمشي.. تمشي.. تمشي.. تحس بوخزة في ساقها، مانتبهتش و زادت قرصت أكثر، توجعت أكثر، و كملت تمشي...