بش نحكيلكم سر بش تعرفوا البشر قداش حتى بروحو غدر

كي كنت صغيرة كان عندي برشة أوراق بيض فارغين ، كي نروح مالشارع للدار نفرغ فيهم كلام القلب والعينين ،

كي كنت صغيرة ما كانتش عندي أختي ، حتى كي كبرت زادة هه ، أما عملت ملف سميتو دنيا وخبيت فيه وراقي وحسبتوا أختي

نحط فيه همومي حكايتي وفني وحتى كي نتعثر في الحجر على ورقة من أوراقو نطبع دمي

كنت كي نقعد جامعة ما نكتبش لدنيا

نعنقها ونقلها سامحني فماش ما تسامحني ونزيد نعمللها تلخيص زوز أوراق فماش ما ترضى وترجع تضحكلي

بش نحكيلكم سر ، دنيا ، خبيتها كما خباتلي حروفي ، قوتي وضعفي وخوفي ..

ما شافها غيري حد ، انا أصلاً نخاف ونغير عليها ،  وكان نلقى حتى عين ما تجي عليها


صغيرة مسكينة أختي ما تعرف شي ..

بش نقلكم سر, الدنيا زربت بنا ، وانا ودنيا نسينا بعضنا وعلى بعضنا زدنا تلهينا ..

كي كبرت معادش نحب نكتب فيها ، حتى مالغبرة كثرة عليها ، قعدت شهور ما درتش بيها ، والشهور كبروا ولاو سنين ،

كبرت وليت نعرف نخبي الكلام في قلبي ولا نحكي لصاحبتي ولا حتى أمي

ثقلت يدي عالورق ووليت كي نحب نكتب نجبد الماكينة ، أما باقي ماهيش كتيبة بنينة ، ريحة الستيلو عالورق كي النوار العربي في جنينة

كبرت ومسقطني ، نعرف ، كي هربت عليها ..

تفكرتها من فوق السما فالطيارة ، حسيتها توشوشلي .. مسكينة متحيرة وحزينة ..

مخيبها الدنيا كي في أحلى حاجات تنسينا ..

أنا وحكايتي كي كنت صغيرة .. كل شي وفا قعدوا كان الأوراق .. وانا ودنيا تقولش علينا قصيناها

والكتيبة إلي  بنتنا وفاة

أما انا نحبها ، هي أول حاجة بديت نكتب فيها وهي اخر حاجة مفيهاش خبث ، هي ألي خلاتني نتوجع نتلطخ ونقوى

نحبها هي ، فيها حروفي ، فيها فرحة دبش العيد والعمر البعيد ، فيها هي كنت صغيرة خممت كان في السزيام ما خممتش فيا كي نكمل القراية ونخدم مع فلان وفلان ....

نقلكم سر وقتها كنت ياسر صغيره خبيت بين ورقها ، غلاف كعبة حلوة عطاهالي ولد قسمي ونوارة دفلة من عند صاحبتي ومياة فرنك ربحتها في خطار ..

وقتها كنت نلم في حاجات تافهين أما حبيتهم برشة ، وما فهمني حد ودنيا فهمتني

بقلم يسرى عز الديني