بعد ساعات هكا نقعد وحدي.. نسرح شويا في المجتمع متاعنا.. و نقعد نفكر هكا في برشا حاجات..

على سبيل المثال: إنو لي مطول شعرو موش راجل، و إلي عامل شعرو على جنب جبري ..

و إلي لابسة نقاب عفشه و موش مزيانة و لابستو باش تخبي خنارها..

و إلي حالل سوريتو يوري في شعر صدرو في بالو بروحو سيكسي!!

و إلي مسكرها عللخر راهو متخلف و جاي مالريف..

إنو المرا المطلقة عيب تروح إمخر في الليل..

إنو لي يحكي فرونسيه يمثل زعما زعما وإلي ما يعرفش يحكي بيه معناتها جاهل..

إلي لابسه شركه في ساقيها راهي ليزبيان .. و إلي حاطة برشا ماكياج  راهي فاجرة..

إنو لي ما يتكيفش موش راجل وإلي يتكيف ممسخ و مقرف..

إنو لي يحكي برشا لكزة و يوتر لعصاب و إلي ما يتكلمش جمله راو يتنومس دخلاني..إنو لي ياكل عند لعباد على راحتو راو ما يحشمش.. و إلي ما ياكلش راهو عامل فيها حشام..

إنو لي تمشي مع طفل في الشارع اليد في اليد راهي عاهرة و موش بنت عايلة..

إنو لي عندو برشا حوايج راهو واحد نظيف و ولد عايلة..

و إلي معندوش موش نظيف و موش ولد عايلة..

يا أميي!! شنيا هالحالة ؟ شبيكم؟ يزيو مالكلامات و السلامات و الحكم عالعباد بالمظاهر..!!

موش لازم إلي مطول شعرو يكون موش راجل.. ياخي طاحت رجوليتو كي هو طول شعراتو؟؟!!

و إلي شعرو على جنب عادي هو عاجبو هكاكا..

و إلي لابسه نقاب تنجم تكون ملتزمة..

و إلي حالل سوريتو موش بالضرورة يكون يستعرض في روحو..

و موش برك عندو شعر في صدرو برشا عباد عندهم..

و إلي مسكر سوريتو عادي هو يشوف في روحو محترم و عاجبو هكاكا و هذا شي ما يقللش من قيمتو.و المطلقة! تموت؟ خليوها تمشي وتجي على راحتها .. يا مرضه !

ولي قاعد يحكي فرونسيه في الديسكور متاعو عادي ينجم يكون يحضر في كور فرونسيه و أستاذو موصيه باش يمارس اللغة باش يتحسن فيسع..

و إلي ما يعرفش يحكي فرونسيه عادي ماهوش باش يموت ينجم يكمل حياتو نورمال..

لي لابسه شركه في ساقيها موش بالضرورة تكون قليلة تربية ولا ليزبيان عادي هي حابة تلبسها..

موش بالضرورة إلي لباس معناتها ولد عايلة و إلي ما يلبسش ولد كلب.. توا لعباد لكل ولات تلبس مالفريب.

يا سطحيين! يالي تعيشوا بالمظاهر! تعمقوا بمخاخكم شويا..

أحكيو مع مخاخ بعضكم.. إسمعوا بعضكم.. ناقشوا بعضكم..

خليو خزرتكم أعمق شويا..

تعمقوا يرحم والديكم!

والسلام عليكم