ايّامات الفاك ..

souvenirs-tgm-carthageKhaoula Ouaynia Baccouche - خولة عواينية بكوش

-   " هيّا بربيّ هيّا"

-   "يا بنتي صلّي عالنّبيّ " يا خي نصدم هكّاكة بلاش فلوس

-   تي هيّا تونتصرّف تي عندي الفين

-   باهي الفين نقصّوا بيهم التساكر و لاّ ّ نفطروا بيهم

-  تي هيّا تونتصرّف تي شبيك جبانة

-   يا خويا نخاف تعرف بابا صعيب ... باهي هيّا راني نعرف جرّتك

وقفنا قدّام الخلاّص

- تيكي بربّي اميلكار

- وحدة بركة

- ا ي اي

- تي هاكم زوز

تلفتتلي : بفففففففففف مرزنو هذا اسمو كلوففف

- نعم؟

- لا نحكي مع صحبتي

- اسمع اهوك عمّ الكنترولور راك وانت تقصّ اسبقني خطوة و اعطيني التيكي ...

وقّفنا عمّ الكنترولور قلّي اتعدّى و هي وراتو التسكرة

ركبنا في يدينا زوز كسكروتات يجيوا كلّ شيّ الاّ كسكروتات يعبيو الكرش و كهو .. وصلنا لاميلكار نحبّها برشة لبلاصة كالم لاحسّ لا تلوصيق لا تكوليف تكيّفت ...حكات .. حكات .. حكات ..
بكات .. و بعد اطّرشقنا بالضحك ضحكنا برشة برشة برشة.

- ايّة للّة كيفاش المرواح رانا صفر ملّيم ..

ضحكت .. مولاها ربّي .. تبعني

نقزنا ..شافنا عمّ الكنترولور ..: هاي هاي وين على خير لا تيكيات لا سيدي زكري و تتشوحرو مالفوق ما ثمّاش تيكيات مثمّاش ركبان في التران

هههههههه اللي يسرق يغلب اللي يحاحي غزرلنا لبعضنا زرفنا بين زوز عزايز و بالشماتة ركبنا في البروميي كلاسّ . . كي طلعنا مشى التران شويّة و شفت راجل مركّز معايا وجهو مش
غريب عليّا .. يغزلي .. حسّيت روحي نعرفو . . يثبتّ فيّ يا ربّي وين نعرفو .. سالتها قاتلّي يمكن قرّاك في اللّيسي .. قبل الترمنيس بمحطّة  هبط السيّد و تلفّتّ طلّت عليه " تبكي الطيور ..
" و عملتلو جاست بيديها .. ياااااااا مسقطك علاش اكاكة ياخي شبيك مكلوبة " .. لا يا بكّة اذاكة عمّ الكنترولور اما نعرفك شوهة و قلبك علّيمين ما حبّيتش نقلّك "

هبطنا و مشينا في شارع بورقيبة و شمينا ريحة تونس البنينة عبّينا عينينا بالنواوريّة .. ايّامات مشات و تعدات يا حسرة ..

خولة عواينية بكوش
ايّامات الفاك ..