وقت تغلبك الدموع...

ديما دموع و كهو بلاش سبب او الأصح مكش عارف بالظبط شنوة السبب و انت تبكي ف الدار و البرا قدام الناس وحدك تبكي بلاصوت بلا حس كان الدموع هابطة انت تمسح عينك و هي تعاود تبلل و تغلبك الدمعة و تهبط اكا الدمعة الرزينة المعبية اللي تهبط ديراكت فالقاعة  كي تهبط تسمع حسها ...

و وقت تتسىأل شبيك تزيد الدمعة تقوى و تلقاها هي اللي تجاوب الفم يتسكر و اللسان يتعقد و تهبط الدمعة تفيع عالخد ...

تبكي من قوة الوجيعة و من كثر الوجايع مش عارف أناهي الوجيعة اللي مبكيتك...

تحير!...

تسأل روحك علاش؟؟

والقوة فالإجابة !! ابكي و أسكت مفماش علاش؟؟

تعاود تسأل روحك باهي لوقتاش؟؟

كيف كيف فماش اجابة !! كمل ابكي لين تسكت!!

خلي العين تحمار و تتنفخ ! الخشم من كثر ماتمسح بالبابي مشوار تسلخ !! زيد إبكي لين تسكت و متسألش علاش و كيفاش و لوقتاش!!

ابكي و وجيعتك متنساش !! خلي روحك تعيش تقتلهاش!! ابكي و اتفكر شكون خلاك هكا!!

متسامحوش!! متحنلوش!! اكرهو متحبوش !! ادعي عليه و لربي اشكي بيه !!

بكاك!! وجعك!! نساك !!هجرك و خلاك!!

محسكش!! خلاك وراه ومتلفتلكش!! كي انت تفكرتو هو  متفكركش!! حب روحو و محبكش!! وجعك و مسكتتش

هبطلك دموع و دموعك ممسحلكش !!

ابكي و اتفكر !!

اتفكر الناس لي حبتك و مستنتش حتى تحبها!! تستنا فيك بكلمةباهية تودها!!

ابكي و اتفكر حبابك و اصحابك !! تفكر اللي قلك متبكيش !! بلا بيك منجمش نعيش!!

انسى اللي يتنسى و عيش اللي يتعاش!! فيق راك بقيت برشا فالإنعاش..

ابكي ومتنساش!! بش تخلي لروحك فرصة تضحك عاللي في نهار بكاك !!

ابكي و اضخك و صيح امشي تحت المطر و في قوة الريح ..امشي في طريقها متبعش الناس اللي قالولك سكر بابك و كون ضدها !!لا امشي وسطها و اغلبها راو مايدوم حال و قد مايطول

الليل مصيرو يطلع النهار  و قد ماتصب مطر مصيرها تزرق الشمس ...

عيش ..!

كلام نساية مع روح نساية ...كلام لاهو موزون و لاهو مفهوم اما هوكا كلام و كهو..!