قلت هو الاول و الآخر و كنت نقول اللي بخلافو ما ليا حد...

و في الآخر...

عيشك و يكثر خيرك... بخيانتك كفيتني... كنت طول عمري نحسك بلاش ضمير معايا... ما تحسش جملة....

مررتلي أيامي و ظلامت الدنيا قدامي...

قتلت كل حاجة حلوة و مزيانة فيي....

أما حتى بش نوكل عليك ربي ما نجمش... نخاف... باقي مازلت عليك نخاف ... ولا  زادة ماعادش حتى نحب نبكي من خوفي لا دموعي تطيح فيك...

أما نعرف و متأكدة بش تبقى تتفكرني و تلوج علي... و على محبتي و حنانتي...

خسارتك طلعت غدار...

حبي ليك عمرو ما كان في صالحي بالرغم اللي حبيتك بقلب و رب... عطيتك كل ما ليا... عملت كل اللي عليا... و أكثر... و عمرو ما ثمر... عمري لا نهار فرحت من محبتي ليك... ما نتفكرش منك مرة حبيت تفرحني فيها ولا حاولت...

مش كان طبيعتي و نفسيتي، حتى ملامحي تبدلو...

حسيت روحي كبرت و فتت عمري ببرشا... بسنين... عمري ما حسيت روحي متهنية و مطمانة...

ندمت... أول مرة... بالحق حاسة روحي نادمة...

اللي حبيتك... حسيتك طلعت ما تستاهلش... ما ريتليش بيه...

ما كارنيش نتعب و نقول مشا و خسرتو... خاطرك ما حبيتنيش...

و مش بش تفرق كي نرى راحتك بعيد علي...

تعبت من العذاب... نحب ننساك و نرتاح... يزيني ما ضيعت وقت معاك...

هز ذكرياتنا الكل معاك و خليني بلاش...

خاطر كل شيئ يفكرني بيك... وين ندور نراك... نسمعك... نحسك... نولي نحس روحي عاجزة و مخنوقة...

كل شيئ، كل كلمة، كل بلاصة تفكرني بيك، بكلامك، بضحكتك، بغزرتك...

هزهم... خليني بلاش... خليني نرتاح...

ماعدش عارفة كيفاه نعيش و  لا منجمة...و حتى كان الضحكة على الوجه تبان اللي من داخل عالم بيه كان الخالق...

نحب نعرف...

زعمة مرتاح ؟ ترقد مرتاح ؟ ضميرك مرتاح ؟...

مازلت بيني و بين روحي نقول مش هذا اللي أنا حبيتو و اللي عمري عطيتو...

ما نكذبش... حتى كي نبعد مش معناها مش نخمم فيك ولا ما نحبش نشوفك لباس... بالعكس...

و ما نفلت حتى فرصة بش نسأل عليك...

و زادة...

مازلت نستنى...

بالرغم التعب و العذاب، نستنى...

شنية متوقع من انسانة عدات وقتها الكل تحب فيك....

معناها انتي نقطة ضعفي...

اما شنعمل مع انسان وجعني و ما نجمتش نكرهو...

يظهرلي و نحي اللي ساهل ننسى روحي و ما ننساكش...