عسلامة يا حمامة ..  و لا نقلك يا خرنانة ..

عسلامة يا عسلة .. و الدنيا معك تحلى و تزهى ..

عسلامة يا بية .. يلي تتبختر فالمشية و الجية ..

عسلامة يا دنيا يا حلمة يا عيشة يا غرام يا شيخة يا عشقة ..

وينك ماأحلى زينك و عينيك .. توحشتك .. توحشت ريحتك لبنينة و يديك لحنينة ..

توحشت صوتك .. إي صوتك وإنتي تحكي وما تسكش و انتي تضحك اكا ضحكة الفضيحة و  صوتك و انتي تغني يفجع تقول نضرب فيك و نغزرلك ونقلك أسكت يهديك ..

توحشت هبالك .. طلعاتك لي تحيرني بيهم .. حبك لي تجنني بيه و ك نراك تجري و طايرة فالسماء و نقلك عصفورتي الحرة عايشة ومتلفة الجرة ..

توحشت نعنقك و في صدري نخبيك و مالدنيا نحميك و بروحي نغطيك وفوق راسي نحطك ونعليك ..

توحشت نبوسك و فيك نضيع و نغطس و نعوم و نلوج وندور ونصيح ونزيد نضيع أكثر ونصيح .. حتى نفيق ونقلهم ويني حمامتي ؟؟ زعمة طارت ! ويني عسلتي ؟ ويني البية زعمة عملتها بي وخلت روحي مشوية

كيفاش نسيت ؟؟  نسيت قلبك البارد ومخك المصعصع خترت تطير وتجنح و تخليني  ضايع ف زناقي ضلمة و بحر غارق نلوج في حلم جميلة ضاعت ف رمشة عين ..

انتي خترت الحرية وأنا مازلت نطلفح في نفس الثنية ..