انا شكون.. انا تلقاني وين تمشي... في الشارع...الكياس نبيع الطابونة ويدي على القوجة مصفونة... في المدرسة مع الصغيرات... وفي الجامعة بين الكبارات... في داري بين راجلي و صغاري... وفي السبيطار نواسي المرضى ليل و نهار...

وفي المحكمة على خاطر الزوالي و المظلوم صوتي عالي... وفي الجيش علي تراب بلادي قلبي ينادي... نسوق الطيارة بثيقة و شطارة... و تلقاني في البار نشرب و نواسي بو الصغار لي تاعب من مرتو و الصغار.... و تلقاني في الكازينو نميل حزامي ومعاه يميلو لي بالعينو....

انا المرا !انا مميتك لي بحضنها دفيك... ومرتك لي تغير عليك... واختك لي تخاف عليك ...و صحبتك لي تعشق الهبال لي فيك... انا عرفتك لي تنصح فيك ..و زميلتك لي يدها في يديك.

انا الشهدة الي تذوب في الحلق... و الجمرة لي تحرق الجواجي... تحبني راجل معاك نكون... وتحبني مومس نولي شيطان  بقرون نتقلب و نتقولب... بالكلمة نجرح و نداوي... في الخير معاك لولا تلقاني... وفي الشر نسبقك ونعلمك يازوالي..

تحبني معاك و الا ضدك القرار يا عزيزي راهو بيدك... كونلي راجل نكونلك فحلة.. وكون فرخ نوليلك وحلة! في نعمة  معايا تعيش... اوجعني نعيشك في نقمة و ناكلك حشيش و ريش!!انا المرا المره ..انا  المرا... الحره

بقلم سمية الرحموني