نحبك...ايه عييت منها الكلمة...لين وليت نتقلق كي نسمعها..نحبك ولت كيما كلام امي اعمل اذيكا و ما تعملاش اذيكا....كيما وين تقلي مشك بش تتبدل ..و تبدا تميل في راسها و تقلي اش بش يجرى فيك نهار...

هاي و،شنيا المشكلة ...محبتك تعبتني...كبرتني ...ذوبتني رماد و ذبلتني كالوردة...محبتك سكنت فيا و محبتش تخرج...اي كرهتها كلمة نحبك...الوقت بش يهرب بينا...و ان عمري يجري...و انت مازلت تقلي نحبك...و انا باقي نتنفسك فيك...باقي نحلم بيك...باقي نمن بيك...باقي معلقة فيك ...باقي نهتري بيك و انت تقلي نحبك...

اي و مباعد ...تحبني و تموت عليا و مباعد....تحبني و نحبك و نكملو في الخرافة و مباعد ...نستنى ...و نستنى اما قداه بش نستنى اشهر و لا اعوام ...ليالي و لا سوايع...تي ماو واجهني..صارحني...فاش تستنى...نستنى امك حتى لترضى...بش نمشي نقعد معاك في قهوة و انا مرتاحة...بش كي يعرضنا حد نعرفوه منبدلوش ثنيتنا...بش نعنقك مغير منخاف نضيعك...تي ماو خلني...نصارحك...ماو خليني نحكيلك على حلماتي معاك انت..خلني نلونلك ايامي ..خليني نهد الجبل اللي على كتافي...وقتاش...قلي وقتاش و قداه ....تكلم...تكلم ياخي لعمر قداه فيه ...بش نصبر عليك ...بش نفرجو ...بش نكمل عشقتي ...تكلم

هذا لكل كان مرمي في قاع بير منسي.  هذا لكل حطيطو بين تراكن روحك و،ساكت...نعرف نعرف كل شي ...اما نخير سكات..نخير ما نخسرش الروح خاتر الروح...هي انت...انت الوقت...و،انت كل شي ...منحبش نوعدك...ما نحبش توجعك...منحبش نسلم فيك...نحب نموت في عينيك...و،نغرق في،شفايفك...نحب ترقد بين يديك كالغشير الصغير...و انت تخرفلي في خرافة...نخاف ...نخاف نكمل و ما نشربش مل العين.  نخاف...ما تكتبليش...نخاف  لتتعب معايا.. نخاف لدنيا تخلافنا...نخاف حلماتك تتبخر مع المطر ...اي نخاف...نخاف لدمي و دمك ميتخلطوش...نخاف نضيعك بين يديا ...نخاف عشقتي ليك تكون عاقرة و متضناش....نخاف...لصبر ينسانا...نخاف لمطر تصب و ما ترويناش....

اما نحبك نحبك نأخذك...نحب نكبر معاك لين نمشيو بالعكاكز...نحب نجيب منك تشكيلة متع ماتش كورة...و قبيلة...اي اي قبيلة ...نحب دمي بولي دمك...نحب نشم ريحتك و ما نشبعش...نحب تطيبلي و نبدا شايخة عليك ...على دخلتك بعضك في الكوجينة ..على هزت حاجبك...على دلالك متع الغشيرات الصغار...نحب نجري رواك في تراكن دار...نعنقك...نبوسك...و نحطك تحت جناحي و نطير بيك...نحب نشرب قهوتي معاك...نحل عينيا فيك...نتغزل...بيك نطير وحش سنين...نحبك تربطلي كرافاتي و تبعني لباب الدار...و انت توصي على حليب الصغار ....و نتعدى ناخولك كتاب جديد...تحبك...نحبك...و نحب نكمل كل شي معاك...نحب نكمل كلامنا مبعضنا..نحب نسافر انا وياك...نحبك تكتبلي...نحب نذوق معاك حاجات جديدة...نحب نهزك للمسرح...نحب نعلمك..ما تخافش و تقدم...نحب نقسمو الفرحة...و نوحدو الروح...