اليوم ريتو بعد 3 شهر و 3 جمعات أنا كالعادة مع عشيرتي  و حسيت حاجة مش عادية تلفت نلقاه ورايا ..حسيت بيه مريتوش...قريب منعرفوش...ريتو تصدمت بهت في روحي كيفاه معنقتوش...

يدي ترعش و ساقي معاش شايلتني ...مديتلو يدي سلم عليا وسلمت عليه خزرلي خزرلي و لزني ليه كبس عليا و انا نسيت الدنيا بين يديه...محنو ومبن الريحة اللي فيه...أما مسكين ضعف و معادش اكا الصحة و الزين اللي فيه و اكا البدن اللي كان صلاة النبي عليه كل شي تبدل فيه ماقعد كان اللون الاخضر مزين عينيه ...

ساكي في الصال لداخل دخلت هزيت ساكي و خرجت مشينا و وحدنا بقينا وياليتنا مابقينا ...لا عرفنا نحكو و لا حكينا كان الدموع معبيا عينيا...شردت فيه و نسيت روحي قتلو توحشتك قلي خليني ساكت خير

قلي فيبالي فالبعد وقويت و قدمت القدام ريتك في لحضة كل شي رجع لتالي معاش القدام ...

فيبالنا ولينا اصحاب و نسينا اللي احنا مانجمو نكون غير احباب...خاتمو لتو في يديا و خوستي متنحاتش من يديه...

دموعي هبطت ....بيدو مسحلي دموعي و قلي عيب تبكي راجل تعرف دموعك تبكيني ....ضمني ليه و خلا روحي عندو ...تمنيت الدنيا تاقف و انا في خضنو...

و قالي هيا نمشو بحذاهم ...قتلو برا تو نجيك ...قلي معاش تحب تمشي معايا...قتلو اصلا مع غيرك منجمش نمشي...شدلي يدي كبس علاها و باسني من كفي و مشا و انا نمشي معاه...رجعنا فدلكنا مع صحابنا شوي وحكينا...منجمتش نشد دموعي كي نتفكر لي هو بش يزيد درج و يمشي و يخليني ...هو مشا و انا اطرشقت بالبكا و عشيرتي تسكت فيا...مشا وجا لقاني نبكي قلي يزي بلا بكا برا اغسل وجهك و ايجا...مشيت غسلت وجهي و جيت نلقي عينو حمرا و شوافرو مبلولين ....سكتني انا و هو بكا ...معاش ينجم يحكي سلم علينا و مشا... مشا و هز روحي معاه...

انا و ياه مع بعضنا و الدنيا و الناس ضدنا...

الله يهدي و يسامح اللي كان سبب ...بكاني و بكاه اما ربي فوق منا و ربي وحدو يتولاه...