- حبيتو!؟

- نعرش ،يمكن اي ،يمكن لا.

- في لحب  مفماش ما بين البينين ،يا اكحل يا ابيض ..

- انا محبتوش،اما  في لحظة دنيا بلاش بيه كحلة، ضلام ،تخوف ،نحس روحي في داموس غارق ،نحب نخرج منو ومنجمش ،نصيح ،نعيطلو ايجاني ،اجريلي متخلينيش ،نبكي ،نصيح ونصيح

،نعيط،دموع تحرق على خديا ،ريق شاح مالصياح السكات، وفي لحظة نبرد ،قلبي يتكبس ونقول كهو يزي ،فيق يا طفلة ،الزمان يجري و الوقت لف لف وانت واقفة على اطلال انسان محسش ومش بش يحس بيك ،نمسح دموعي ونتبسم ،تبسيمة مخلطة بوجيعة وقوة ،في لحظة نحس روحي سكيزوفران ،مريضة ولازمني برشا دوا ،

اما  هو مرضي و هو دوايا ،هه مش قتلك راني  سكيزوفران ،قلبي يقلي اخطاك لعيشة بلاش بيه مش هي لي تحلمي باها ،ومخي يقلي انت انسانة ضعيفة وتستاهلي لي صاير فيك .مخي تحرق وانا سيقارو ورا خوه ماالتخمام ،زعما ننساه،زعما نبرى ونولي لاباس  ،هام يقولو الوقت ينسي بني ادم اسمو ،

اما انا الوقت حابس ،حابس ومش حاب يمشي ،عامل عليا بالعاني ،تعبت وكرهت تعبي وضعفي ،ضعفي وقت يجيني في نحبك ،سامحني ،كونلي الام لي تعاقب صغيرها ،عاقبني اما ما تبعدش ،حبني وداويني ،تي انا مالقيتش دوا لدايا بش نلقى ليك  .مشيت ،هربت ،خطرت بش نهرب منو ليه ،مهبولة نعرف ،اما مهبولة بيه ،و نحبو ..