قد حبي ليك و أكثر نكرهك ..

قد حبي ليك و أكثر نقمت عليك ..

و قد الحب اللِّي كان بيناتنا الكل ليوم باش نمحيك ..

تعرف ؟!

واللّٰه نحب نقتلك ، نقطعك ، نشرحك طرف طرف .. و نرجع نحييك و نرد الروح فيك ..

و نرجع نعمل من عذابك صنعة ، و نشقلك صدرك بموس حافي و نقلعلك قلبك بعروقوا ..

ماو هذا قلبك اللِّي كذبت علياا بيه ؟

ماتخافش عليه حبي هااو بين يدييا ، مش بااش نعملوا شئ ..

فقط نعبث بيه كيف ماعبث بيا كهو ..

تعرف ؟

واللّٰه قداش شاهية نلطخوا على الحيط ندڤدڨوا ، نعفسوا تحت ساقي و نشد إبرة و خيط و نغرزوا شوي شوي و نخيطلك قلب يخرج عليك ..

ولا قلب مريض و نفصلوا كيما نحب اني و نرميه زعمة ولاا ؟! ..

لا لا لا ماتخافش تو نرجعهولك ،، أما مش كيف ما كان ...

ااااا ماالة ، ماك تعرف عندي مبدأ فالحياة : العين بالعين .. و السن بالسن .. و تي ماك إنت اللي بديت ...

ههههههههههههههههههه اي تسخايلني نسيت ؟

بالكشي ماشي فيبالك بالساهل باش ننسى دموعي و وجيعة الليالي ؟

ياخي كي رجعت و قبلتك و زدت غرقت معاك في بحرك المشوم تسخايلني باش ننسى شعملت فيا قبل سنين ؟

تحب نذكرك في وجيعتي بيك و مرضي ؟

تحب نذكرك فالليالي اللي عييت فيهم نبكي و نستنى في كلمة ، تبسيمة ، غزرة ، ولا حتى همسة منك بيها نعيش ؟؟

و إنت وينك وقتها ؟!!!!

هههههههه ... مزلت نتذكر إسمها ، وجهها ، و كلامها لي يقززني ..

فيبالك مزلت نكرها و ننقم عليها ؟؟

ما كنتش نعرف نكره و ننقم .. إنت لي علمتني .. بضبط كيما علمتني الحب ..

أماا تو ماعليش ڨلبي تحجر و والفت وجيعتي و سهر الليل و قهوتي المرة ، يعني بحبك ماعلاباليش ..

و تو الدور جاء عليك و مانيش باش نرحمك ...

هذا قلبك اللِّي عفنتو بيديا و ماتسالنيش ماو قتلك إنت اللي بديت  ... آآه بلع فمك و ماتبكيش و حتى كلمة  "ماما" إنساها ماتقولهاليش ،، تبريت منك ماللي دخلتك لــ هالبيت .. و ماذابيا

حسك ماتسمعنيش ...

تو لازمك تكمل حياتك في الظلام هذا و نسكر عليك بمفتاح كــبــيـــر و وراء سبعة بحور نرميه  و لغريق لبحر نهديه و مايهمنيش .. لازم تعدي ليالي عمرك تبكي و تنين و روحك مقسومة في

ثنين  ..

لازم تخلص فطورة وجيعتي بيك فالدنيا قبل الأخرة

و فيبالك ؟ واللّٰه قلبي مزال يعشق دين والديك ..

أماا عقلي مشوم و من اول يوم كرهك ماحبش ،، ماهضمكش .. بطبيعتوا ماعندوش قلب و مايرحمش ..

و اي ماو حكيتلك عاد و قتلك شر عقلي سيطر على بدني الكل معاد شئ يوقفوا !!!

و تو نخليك باش نخرج ... نحب نعيش ..

نعيش في دنيا السلام .. دنيا الكتب و الأوراق .. دنيا الألوان و الحياة .. دنيا الموسيقى و المسرح و الفن .. الدنيا لي نحبها اني ..

حبك مايعيشنيش .. و قلبي لي حبك نسكر عليه و نخبيه ..

و كانك على الروح ماتوصيش ..

دوات جروحها بدموعك و على خيال الريح كتبت بدمك ..