يقولو المكتوب غدار وفرحة حد ياخوها حد آخر، شنوا يصير لو كان المكتوب وقف معانا؟ لو كان لي تمنناه يتحقق ولا ما نكونو عباد كان ما نعتذبو!

شنوا يصير كان عرسو الليلة كان عليها هي، موش علي ختارتهالو أمو، شنوا مش ينقص من الدنيا كان فرحتهم كملت بالهناء وبسقف وبمخدة وحدة!

علاش الوالدين يظلمو ساعات ويحطمو مستقبل ولادهم؟ كان خلاتو أمو يتصدر بجنب لي ختارها قلبو ورضي عليها عقلو، موش بجنب لي قلبتها هي وقتلو خوذ وعليك الأمان وكان تعارضني قلبي وربي غضبانين عليك لقيام الساعة ..

علاش حطمت عشرة أكثر من ثلاثة سنين، وأحلام أنقى من الياسمين .. عمرو ما شافلها نظرة غالطة وعمرو لا تمناتو كان بو لولادها .. دارهم لي بنوها حجرة حجرة وفي كل حاجة يشريها

للدار يجي ويوريها، يحطلها يدها عالحيط ويقلها الدار هاذي بنيناها مع بعضنا وما نكونو فيها كان مع بعضنا ..

الجنينة لي تمناتها ولي تحبها هي، عملهالها وغرسلها فيها ياسمينة كبيرة وقالها هذا لي حبيتو وهذا لي يفرحلي فرحة قلبي ..

أمو الحنينة عليه، ضيعتلو فرحة حياتو وضيعاتو هو أكثر ..

ويبقى المكتوب أكبر ظالم .