يقولو..

المحبة اللي جابتها الشفقة..مش محبة..

و المحبة المبنية على صفقة..مش محبة..

و انت محبتك.. مشقّة..طريق غريبة.. ثنية صعيبة.. خايف منها نولّي نعاني.. مريّض فاني.. لوني مدجّج.. خايف منها لا نتمخوج.. خايف منها لا نترهوج..خاطر العثرة في خطاويها.. زلقة بفلقة.. و أنا باقي فيها مكمّل.. مش مخمّم..باش نسلّم.. لا نجمت نسلم فيها.. و لا عليها مرّة نتكلّم..

ولاّتلي غصّة في حلقي..كيف الخنقة..كيف العلقة.. ماتخرجش مع التنهيدة.. ما تتعداش مع الشهقة.. ساكنة.. ماكنة.. في قلبي كيف الدقّة..كان تضعف بالحسرة نموت.. كان تتقوّى عليّا نشقى..تتخبى.. تتربى.. عندي كيف الحبقة.. تترعرع ما بين عينيا..ونراعي فيها بالدِّرقة..و أنا بروحي نحاذي فيها.. ورقة بورقة.. بلطافة..بظرافة.. و رقّة.. باللي تطلب مني تلقى..

زعمة يقولو عليها محبة..زعما يقولو عليها حكاية عشقة..حروفها مكتوبة بالسّرقة.. و كل ما جيت نصرّح بيها تهرب مني كيف النّزقة.. و إذا جيت باش نهرب منها..تعمل عليا بلعاني..تترجاني..تحكم و تتحكم فيا..تقلّي أبقى.. زعمة يقولو عليها محبة.. و لا تخربيشة على ورقة..