- علاش مش نحكيلكم بالظّبط ؟ حرت .. أنا الّي ضيّعتني السّنين و طيّشتني الأيّام و رماتني الدّهور و نساتني الفرحة وحدي مقهور .. أنا الّي ملقيت حدّ ؛ طريقي بيديهم تسدّ ..

أنا الّي شربت من كاس الظّلم لين رويت ؛ لين جواجيّا تحرقوا و ما قلت أحّييت ؛ أنا الّي تعفست وردة عمري الّي بيدّي رويتها و سقيت ؛ تعبت تعبت تعبت و جريت و جريت .. و ما قلت عييت ؛بالعكس أنا لحلمتي كلّ دقيقة حييت... شنوّة تحبّوا نحكيلكم و منين نبدى ؟

نقلّكم أنا كيفكم نعدّي نهاري شايخ مالمدرسة للّعب مع صحابي للمخدّة ؟ نقلّكم لباس عليّا عنّا دار و ناكلو مليح و كياس منّو كلّ صباح للمكتب نتعدّى ؟ .. هذا الكلّ مفمّاش منّو .. مالا شنوّة تحبّوني نحكي ؟ نقلّكم بلادي متفكّرتني بخيرها مغرّقتني ؟ نقلّكم عايش كيما الصّغار الكلّ ؟

و الدّنيا في عيوني مزيانة ورد و فلّ ؟ نقلّكم منيش نعاني لا حكومة لا وزير نساني ؟ .. هذا زادة لا .. ماذابيّا نقلّكم عيشتنا محلاها ؛ نقلّكم دافي و لابس مليح و شبعان و ياسر فرحان ؛ نقلّكم نقرى وصحابي يحبّوني و قييت ناس وقفوا معايا شجّعوني ؛

ماذبيّا نقلّكم ما سمعتش كلام دوني ؛ مقيتش عباد حقروني ؛ ما نعيشش في بلاد كباراتها نسوني؛ لا حقّا؛ لحقيقة فمّا مرّة تفكّروني ؛ وقت الانتخابات نهارتها كان يلقاو على ريوسهم يحطّوني .. صحيح صغير ؛ أما راجل في قلبي عصفور يحبّ بجناحاتو هو يطير؛ يحبّ يعيش و يعيّش الّي يحبّهم في خير ؛ يحبّ يقدّم و القدّام موش لتالي يسير ؛ يحبّ يمشي للمدرسة و يتعلّم مغير ما يبقى يخممّ في الثنيّة البعيدة و يبطّل كي يحيير ..

صحيح الوظع هذا تفرضّ عليّا ؛ صحيح الدّنيا بهمومها متكية على ظهري تقسم فيّا ؛ صحيح قلال فيكم سائل عالّي كيفي و عليّا ؛ أما فرحان :) ؛ هاكم تشوفو في ضحكتي ماليا الدّنيا ؛ صحيح تصنّفنا فقارا في بلاد تستعرف كان بالغنيا ؛ أما كيما قلتلكم فرحان ؛..

فرحان خاطرني راجل ما مدّيتش يدّي و ما خنتش ترابي ؛ نحبّ أرضي و هيّا سبب عذابي .. نضحك عالدّنيا ماشي في بالها مش توقّفني؛ و عليكم كي تقولو مسكين و تتعدّاو نضحك علّي خذاولي حقّي و فمّا ربّي نساو ؛ نضحك علّي كلاو الدّنيا و تصحّروا بالاخرة و باقي يتشكّاو ..نضحك خاطر نعرف الّي خلقني أولا بيّا ؛ و لازم فمّا حجرات يعطّلوك في كلّ ثنيّة ؛ ومنغير الصّبر و الشدّة في ربّي هالدّنيا شنيّة ؟ ؛ نضحك خاطرهذا الكلّ و باقي الحلمة ساكنة في قلبي تنبض في روحي حيّة فيّا  ..

اتعلّموا عيشوا ؛ اتعلّموا فنّ الحياة و ثقافة القناعة ؛ اتعلّموا أضحكوا عالدّنيا و للدّنيا و عيشوا عيشوا و زيدو عيشوا رغم كلّ شيّ ..

#المجد_لهؤلاء .. '

#كي_تنطق_التّصويرة ...