الصداقة بعد المحبة... نكتة تبكي

Asma Sakhri Gharsi - أسماء الصّخري الغرسي

توا جاي تفدلك. ..

تحكيلي في ها النكتة و تدكك. ..

بعد ها المحبة و ها العشرة رميت كل شئ وراء ظهرك ...

بعد الوعود و الخاتم إلي لبسناه في صبعي و صبعك. ..

بعد الزغاريط و بعد الفرحة جيت ترمي عليا في همك. ..

بعد الزهاز و بعد اللمة تسيبني دايخة و تعرس و تقولي في ربع ورقة هاني ماشي و إنت ربي يسهلك. ..

تحطلي تبسيمة في الآخر آش تقصد بيها متشمت و الا تصبر فيا ...

ما تعرفش الي بيها هي كملت عليا. ..

ياما قتلك و نهرتك و ترجيتك خليك باحذايا و ما تعملش فيا نهار ها العملة...

مع غيرك ما نتلذذش بنتها القهوة. ..

مع غيرك ما نتصورش روحي بروبة بيضة و متصدرة بعد الجلوة. ..

ياخي ساهلة عندك محبتنا تبيع. ..

و مستقبلنا سلمت فيه و هجرتني ابلاد الرواما باش مع عزوزة غادي تضيع. ..

شنوا هنا إلي ما عندكش. ..

هاك تخدم و بشهريتك خير من غيرك و باقي ما تحمدش. ..

أفقر مني و منك و في بلادو ما سلمش و إنت خليت إلي يحبوك و ركبت طيارة و وراك ما غزرتش. ..

تقولي ما تستنانيش و كان جاء مكتوبك خوذو. ..

ما تستناش راجل خرج و كره ارض جدودو. ..

ما تعرفش إلي حياتي تمنيتها معاك و أحلامي حلمتها باحذاك. ..

موش ساهل عليا نبدلك كيما بدلتني. ..

ما يهونش عليا الوعد إلي وعدتهولك نهارت الي بخاتمك علقتني. ..

تقلي ما تنسانيش و كلمني كيما صديقك كيف نسأل عليك. ..

و إلا حتى كيف يسهل ربي و نرجع نطل عليك. .

علاش تضحك فيا. .. و أنا عينيا بالدموع مضببة ...

ماشي في بالك في بالك المحبة إلي في قلبي باش تولي نهار ماء و نرجعو اصحاب كيما كنا أيامات الكلية مهبلة. ..

الزمان هاذاكا فاتهما يرجعش. ..

الي بيناتنا مالمحبة عمرو ما يولي صداقة ...

و الي كنا باش نمضيو عليه هاذاكا صداقنا ماهوش عقد عمل و الا صداقة. ..

نعرفك ما تحبهاش تي هيا قد أمك. .. نعرفك على خاطر الأوراق خذيتها باش تنقصلك شويا من همك. ..

لكن مالها الا خيانة للأمانة. .. و مالها الا هجر و قلة حنانة. ..

و مالو الا صداق و إسمها مقرون باسمك في مضمونك. ..

و مالي الا مرا توجعت من أقرب الناس ليها برصاصة كانت في مق'رونك. ..

موش هاين عليا نحسب عليك ربي. ..

عارفة قصدك، لكن وجيعتي غلبت محبتي ليك لربي. ..

إن شاء الله ربي يتولاك. ..

و اللطف عليك من كل هلاك. ..

هاذي نهديها لصاحبتي الي موجوعة و تفرفط ملي صارلها و في نفس الوقت ما نساتش عهدها و محبتها ...

ربي يصبرها و يصبر كل واحد قصتو كيما قصتها. ..

بقلم أسماء الصخري الغرسي