كل عام نزيد نتأكد انو العرب مش متعهم رمضان.

رمضان من المفروض اكون فترة تاع تسامح ؛ صلة الرحم ؛ العبادة ؛ القيام ؛ الصيام عالماكلة و الشراب و الغيبة و النميمة و الكلام الخايب . من المفروض فترة رمضان تكون اعز و اهدى فترة ؛ تكون جنة على وجه الارض ؛ نحسوا بالزوالي و المحتاج .

اما هذا كل حلم ؛ خاطر رمضان توة ولى وقت الغشة و الغش؛ وقت ارتفاع الاسعار و علاء المعيشة ؛ وقت  الضارب و المضروب ؛ وقت الصرف و التبذير ؛ وقت الشهاوي و الكبتان  .

تأكدت زادا انو العباد كلها شواطين رواحها ؛ قبل كانوا اقولوا " غلبهم الشيطان " و هوا طلع مسكين خاطيه و الي صاير توة اكبر برهان  على خاطر  الشواطين مسلسلين  في رمضان .

اما هذا زادا ما يمنعش انو ثمة الباهي ؛ ثمة الي انحي من فمو و يعطي لغيرو ؛ ثمة الي يسعى باش افرح يتيم ولا محتاج .                      

ثمة الي احاول باش ابدل من هالبلاد ؛ من هالعقلية ؛ من هالهماجية زدو الجهل.

حبوا بعضكم ؛ حبوا الباهي لبعضكم