الراجل لي نحبو...هو مش راجل كهو..مش ذكر كهو. .هو نصي الثاني. .نصي لي يكلمني. .هو صاحبي. .حبي. وراجلي.

هو لي منحشمش منو ولا حتى نخاف منو. ..خاترو هو الراجل لي يمسح من على خدي الدمعة بصبعو. .ويضمني لصدرو من غير ميسالني شبيك. ..خاتر يعرف وحدو. ..ويقلي تهنى مدامك معايا نخبيك وفي همك نسيك. ..

هو صاحبي لي منخممش في الكلمة لي تخطر في بالي قبل منقولها. ..منخممش كيفاش بش يفهمها خاترو مستانس بطلعاتي وهبلاتي. .البرستيج كذبة متليقش بحبي ليه. .انا قدامو بلار صافي يرا منو وفيه كل شيء. ..ميهمنيش يراني من غير مكياج. ..ولابسه حوايج الدار. .خاتر هو ميقليش شبيك هكة. .خاتر هو ميهموش ...نهمو انا. .تهمو روحي. .

هو لي يقلي محلا زينك كيف يبدأ شعري مشعشط  وعينيا محوقة. .

هو لي يغزر لنور حبي في قلبي ويفرح ويقلي ضحكتك بالدنيا وما فيها كيف على وجهك المزيان نراها. ..الراجل لي نحبو هو لي نقلو هيا نتمشاو تحت المطر ونتبلو يقلي هيا. قالها راجل. .وميقليش يزي من هبالك! نقلو هات يدك. .يمدهالي. ..

هو لي يجبلي وردة وحدة تكفي من غير منطلبها! هو لي يغار عليا وميخنقنيش هو لي عندو الثيقة فيا. . هو لي لا نكذب عليه لا يكذب عليا. .ومنندمش كيف نحكيلو سري. ..هو الواعي والمتفهم. .ومن عقد جدي وجدو متحرر. ..

هو لي يشريلي كتب حتى كان ميحبهمش. .أما خاتر انا نحبهم! هو لي يمشي معايا للسينما ونمشي معاه لاستاد. .مش لازم يكون يشبهلي ولا نشبهلو. .لازم يقبلني ونقبلو. .مدام روحي تسكن لروحو وحتى كان بدني وبدنو مش كيف كيف. .يكفينا انو حبنا يعمل الكيف. ..الراجل لي نحبو  هو انت. ..انت يالي خترت تكون راجل كيف روحك. .راجل مش كيفهم. .مش كيف "الرجال الكل "