الدنيا

Ameni Oueslati - أماني الوسلاتي

مانيش كبيرة أما زادة مانيش صغيرة, ملي جيت عالدنيا و انا نحب نفهمها, حتى كان موش الكل نفهم حتى شطرها

نحب نعرف علاش نهار تضحكلنا و نهار تعطينا بالظهر, نهار مالفرحة تشبعنا و نهار تقتلنا بالشر ... علاش ؟

.علاش دنيتنا تبدى بتزغريتة و توفى بغصة في القلب, علاش تجيبنا بش يحبونا و بعد تاخذلنا إلي تحب

يقولو " الدنيا مع الواقف " أما الوقفة توجع الساقين و تربط اليدين

! يقولو " الدنيا تكتاكة " عمري ما فهمتها هالكلمة أما ما تنجم تكون كان حاجة خايبة

! قالولي عليها حلوة طلع كلامهم الكل دوة

! قالولي كتعطيها تعطيك, عطاتني أما زادة هزت الملمة و إلي فما

.كلنا شادين فيها صحيح, بيدينا و سنينا، كلنا صابرين عليها كرهنا ولا حبينا

هي تعفس علينا و احنا نبسولها ساقيها, هي تمرمدنا و احنا نشدوها من يديها

نعديو دنيتنا نجريو و نلهطو, نعديو دنيتنا في مد و رد و احنا عارفين إلي ماهي دايمة لحد

.الدنيا حاجة صعيبة علي, مرة تكبر و مرة تصغر في عيني

.الدنيا عندي كالطقس, تنفخني كغسالة النوادر و بعد تنورني كالقرنفلة و بعد تصفرني و تشيحني بش كتقلق مني إطيرني

.من قبيلة و انا نخرنن عليكم أما انا أرخص مني ما فماش, الدنيا هذي نحبها و نفنى عليها, حامدة ربي و راضية بيها

! " حبوها كيفي بش تحبكم و ما تنساوش إلي نقولو " نحبك قد الدنيا

أماني الوسلاتي

Website Design Brisbane