جعت .. الجّوع أنواع و جوعي مالوش دوا ، جوع كبير حديد جوع مغلغل وذنيه مسكّر، جوع مخّ مربّط مبلّج !!!

جوعي قلبي للمحبّه و للدّقه الزّايده كي نرى حبيبي ، جوع للوجيعه و الدّڨه الضّريفه كي إيدو تفارق إيدي ، جوع قلبي للرّعشه كي نفسنا يتعانقوا كي شفايفنا على بعضهم يتكالبوا كي

خدّي يترمى على صدرو و صبعي يشطح على حزاموا ...   

جعت و جوعي غول حالل فمّو في لحمي غرز أنيابو، بركان حامي بلهيبو كواني ، جوعي ورد أحمر شوكو شواني .. جوعي لبدن  نملكو نتملّكوا نعبدو نعذّبو على هواي ، بدن نتعلّم فوقو نشطح تانڨو و نعزف ڨيتار و نكتب مابينات أجنابو وصيّتي .. بدن نعجنو ، نبلّو و نشرب عرقو ، نحلّو و نكسّر أمّو . ننفضو من قديمو و لجهنّم نهزّو ؛ نلعب معاه دڨازه و في حفره حمرا ندزٌوا ...

بدن بارد في عزّ الشّتاء بروحي نلفٌوا ، نسخّنوا نطيّبو على نار هاديه للي يغلي ؛ يذوب ، يتبزّع على شعري يهيج كل موج من كلّ شيره يغطّيني من خوفي يعرّيني و فيه نغرق ...

جعت .. و جوعي صغير يبكي ، شاهي حليب أمّو و شهوتي ما تبعدش عليه .. جوعي لعينين تاكلني ماكله ، تنحّيني قطعه قطعه بجرد غزره ، تمسّني و تتلمّسني بنظره ، تكلّمني و الفمّ ساكت ، تقطعلي النّفس ، تطلّعني للسّقف ، تبرّكني تعرّقني توجعلي قلبي تهبّلني تخلّيني كالحوته نفرفط شاهيه تسامحني تخرّجني من سينتي تسيّبني ولا تعنّقني .. المهمّ تشبّعني  ..

جوعي غير كلّ جوع .. الكرش مليانه و الرّوح عطشانه .. جوعي لشفايف فنانه تڨدمني من داخل و تقلّي سملّاه عليك من برّه ، تسبّني بغلّ و محبّه ؛  تمصّ عذابي وتجرحني باش ننسى أوجاعي .. جوعي لشفّه قمحيّه تعفس محيطي و تستكشف الجغرافيا على حسابي ، شفايف تشربني تتكيّفني و تكيّفني تحصرني و بين سنّيها تحصّلني .. شفايف تقرصني تقصّني  شطرين ، شطر يسبّح و شطر ينين ،  شفايف بمحبٌه توجّع من بعدي تتوجّع ..

جعت و جوعي كافر ، لا ملّه لا دين ، جوع أعمى يدهدس في عزّ النّهار .. جوعي لقرصه في خد ؛ صدر ، كرش ... تفيّقني مالنّوم ترعّشني تشعّلني تسيّبني نطير.. جوعي لكومة شعر نغرس فيه خشمي و نهرب بالرّيحه الكلّ ، لفخذ نغرس فيه يدّي و نخلّي أماره ، لضهر نحلّ فيه واد ، ليدين نشطّجهم على ريتم بدني ، نعرّفهم على سرّ ٱدم و حوّا .. جوعي للسان يرتّل على لحمي أشعار الحلّاج و في وسطي يتصوّف يتعبّد و بماي يتطهّر