Written by "la fille qui résiste au plaisir" 

إنت خليتها بيا و مشيت عليا وقتلي إستحقيتلك و حسيت بلي آنا مالي غيرك .. آنا كذبت على روحي و صدقت .. كذبت و قلت إنت الراجل إلي فهمني أكثر مالبقية .. كذبت و صدقت بالي بيناتنا حاجة قوية، بيناتنا 'بوند' موش نزوة طفولية ..

أما أنا وقتها عايشة في الأحلام وقتها عايشة في الأوهام .. الأوهام إلي خلاتني نصدق بلي آنا وياك حكاية حقيقية .. آنا وياك هزتنا الريح، الريح الي تجيب عاصفة رملية تتغطى بيها الشمس و السماء الزرقاء .. نحنا عذاب، نحنا زوز عمرهم ما كانو صحاب، .. نحنا كارثة أرضية .. البيانو هو ألي جمعنا موش حاجة أخرى

أحلامنا هي إلي حسسستنا بلي أحنا قراب أما نحنا ياسر بعاد .. نحنا صحيح نحبو الهوا اللي يخوخج الروآري .. صحيح نحنا نحبو الميتافيزقية .. أما نحنا بعاد و منآش صحاب .. نحنا ابيض و اكحل، نحنا الإزدواجية .. إبعد عليا .. إبعد عليا و خليني نكمل الثنية .. إبعد عليا و خليني نتنفس الحب و الحرية .. خليني نحس بالأهمية ألي إنتي قصيتها عليا .. آنا مانحبيكش إنت، آنا نحب البيانو، آنا نحب المتافيزيقية ...