البارح كنا صغار .. عدّي بروحي مازلت نلعب في الحومة مع الصغار ..

فرحانة بعروستي المزيانة .. 

البارح كنا صغار .. عدّي بروحي داخلة للمدرسة فرحانة بالطابلية و الكرتابلة الجديدة ..

فرحانة بالقراية و كيفاش بش نبدا نتعلم ..

فرحانة باللمجة و اصحابي الجدد .. البارح  كنا صغار .. عدّي بروحي داخلة لليسي ... عالم جديد كبير و مخلط و فيه برشا عباد ..

فرحانة وليت كبيرة و محلاني ..

فرحانة بفرحة امي و بابا ببنتهم لولة ..البارح كنا صغار .. نضحكو من غير مانخافو من الي الجاي .. نضحكو  من غير حسابات .. نضحكو لبعضنا مش على بعضنا ..

البارح كنّا صغار .. الخوف ميعرفلناش ثنيّة .. الي نحبو عليه .. نتحصلو عليه و الي نتمنوه نتعبو عليه ..

البارح كنا صغار .. كانت اليد في اليد .. نحلموا مع بعضنا .. و نعدو النجوم .. نحبو لبعضنا الخير ..

البارح كنّا صغار .. ماكانتش بيناتنا .. حواجز و حدود ..

اليوم كبرنا .. و الضحكة بحساب الخطوة بحساب الحلمة بحساب و الكلمة بحساب .. 

كبرنا و يا ليتنا ما كبرنا.. مجتمع مبني ع الكذب و  النفاق .. نضحك في وجهك  و كي تدور نسبّك ..  نبوسك و نحضنك و الڨلب عليك مغلول ..

كبرنا و الڨلوب سوادت ..

كبرنا و تحرمنا من برشا حاجات  ..

تحرمنا من العيشة البسيطة المرتاحة ..