الأعياد ما تخليناش أحلى ..

ما تخليناش أزين .. ما عندهاش اكا القدرة العجيبة باش تبدل كل شي بين ليلة وضحاها .. وتخلينا نحسوا بالحاجات ازين وخير من حقيقتها " الفظيعة " ..

العالم معبي بالشر ، الشر اللي تنجم تحسو في كل كسرة خاطر تحس باها ، في كل لحظة تحس فاها روحك تجرحت ، تنسيت ، تحقرت ، تهنتلت ، تفهمت بالغالط ، تظلمت ..

العالم معبي بالشر "فعليا " ، وهذي حقيقة ما ينجم ينكرها حد ..

اذاكا علاه في الأعياد خليوها فرصة باش تراجعوا ارواحكم مليح مليح .. حسوا بأغلاطكم اللي فاتت الكل .. اتوجعوا بكل وجيعة سببتوها لحد في نهار م النهارات باش تطهروا نفوسكم مليح مليح ..

وباش ما توصلوا تقولوا " عيد مبروك / مبارك " كان ما وصلت خرجت من أعمق أعماقك .. وين ما حفرت حفرت حفرت ونظفت لآخر ذرة شر موجودة فيك من داخل