بنات بلادي لازمهم يتعلموا يكونوا نساء  العام لكل مش نهارين فالعام كون مرة العام لكل تصرف على انك أخر وحدة فالدنيا  كون كما انتي ما تتبدل على خاطر حد قول إلي يجي على لسانك ما تعمل حساب لحد خاطر نهار إلي تجي انتي في بلاصتهم مش بش يعملولك حساب

كون انتي البس أحكي عيش تكلم تفرهد حب الدنيا حب روحك و خليك بعيدة على الناس و كلام الناس و أفعال الناس

خليك غيرهم خليك قوية ديمة راسك لفوق قد ما يحكيو و يقولو أعمل إلي تحب و ما يهمك كان في روحك المفيد انتي مرتاحة مع روحك  

العمر قصير كان بش ترضي الناس عمرك لا بش تخلط ترضي روحك

انتي كل شي انتي الام و الاخت  و الصاحبة و البنية و المرا إلي بيها يكمل الراجل نص دينو  انتي الجنة انتي الوطن انتي شطر الدنيا  انتي كل شي أغزر لروحك بعين كبيرة خليك محلاك

خليك الطفلة الصغيرة إلي كلها براءة و خليك ثعلب تونسية هههه

احنا النساء إلي وراء كل راجل تلقانا

احنا النساء إلي الكوارث لكل من جرتنا أما ما تنجموش تعيشوا بلاش النساء

النساء هما نقطت الضعف و هما نقط القوة

النساء هما الدنيا لكل

انتي إلي يغنيو عليك و يدافعو عليك و يحكيو عليك و يضلموك و تسامح

انتي القضية انتي إلي إغتصبوك و انتي إلي تكلمت و عليت الصوت و انتي إلي وقفت وقفت رجال في وقت الغصرة انتي الرجلة انتي الوردة انتي أكبر من حاجة الناس يشوفوا فيها كان بدن البدن هذاك هو إلي وصل رجال و نساء ليوم و المخ هذاكا هو إلي عطانا إلي احنا فيه ليوم

و كيما يقولو

النساء النساء الله يعيش النساء

تحية لكل طفلة صغيرة عندها حلم و تحب توصل و تحية لكل طفلة سرقولها حياتها و حلمتها و تحية لكل أم كبرت و تعبت و خدمت على اولادها بلقمت الحلال

ربي يخلينا بش نزيدو نكدو على رجالنا و خوتني و نتدلو عليهم و يزيدوا يحبونا