كي تبدا قاعد تخمم في انسان تحبو برشا و تخونك عينك و تدمّع

تحس روحك مخنوق و تحب تبكي و تشكي اما متأكد اللي مش بش يفهمك حد

و شكون بش يفهمك غير الانسان اللي تو قاعد يحضر في روحو للسفر..

نحس في روحي وحدي بالرغم اللي الناس الكل دايرين بيا ..

ناقصني الأكسجين ناقصني الهواء .. ناقصني انت ..

كي بش تمشي لشكون بش نحكي لشكون بش نضحك ..

شكون عندي بش نغششو و نراضيه ..

شكوون غيرك بش نقلو نحبك ...

نتمنى اني نموت 15 يوم و نقوم على صوتك وضحكتك و تقلي راني روحتلك ..

روحي!! نتخنق و نحس قرن تعدى عليا نلقا الوقت ماتبدلش..

قداش من قرن مازال ؟؟ قداش من دمعة و قداش من مرة بش نتخنق ؟؟؟

نسكت شوي و نحاول نصبر "الحمدلله شنية 15 يوم تو يتعداو"

اي شنية 15 يوم ؟؟

360 ساعة

21600 دقيقة

1296000 ثانية

15 ليلة نرقد منغير ما نشبع بصوتك

15 صباح نقوم و مخدتي مليانة بدموعي

45 مرة نقعد على الطاولة و ماناكلش

75 صلاة نبكي باش ارجعلى روحي اللي مشات معاك

حياتي الكل نؤمن "أن الله إذا أحب عبداً ابتلاه" وأنا مانتصورش كان فما ابتلاء اكثر من اني نعدي نهاري منغيرك اما الحمدلله

الحمدلله..الحمدلله..الحمدلله..الحمدلله..الحمدلله.. الحمدلله..الحمدلله..

هذا الكل صار فيا قبل ما تمشي و تو 6 ايام مللي مشيت

وانا 518400 تانية يتعداو كيما قتلي امي "اللهم اني استودعتك قرة عيني فرد لي وديعتي قريبا يا الله"