إيجَا .. إيجَا حُطْ راسِكْ عنْدِي و اشْكيليِ .. و على همِّكْ أحكِيلِي .. و من الدِنْيَا إبكِيلِي ..

إيجَا يعَيِّشِكْ بضُعْفِكْ قوِّنِي .. و كلاَمِكْ قرِّينِي ..

إيجَا راهُو صُوتِكْ يِشْفِينِي و ضُحْكتِكْ البنينَةْ تبرِّينِي ..

إيجَا غنِّلِي و طبِيعْتِكْ ورِّينِي .. و في وُسْطْ جوَاجِيكْ خبِّينِي و من العبادْ احْمِينِي ..

إيجَا .. خاطِرْ وجُودِكْ يِرْوِينِي و منْ الدِنْيَا الكُلْ يِكْفِينِي ..

ايجا ..  بجنْبِكْ خلِّيني .. و صاحْبِكْ و عشِيرِكْ سمِّيني ..

ايجا .. تي ايجا واسينِي و على فرْحتِكْ هنِّينِي .. و عليكْ لا يشْوِينِي و لا يِكْوِينِي .. خاطرِ خيالِكْ يدفِّنِي و في هالزْمانْ ينسِّيني ..

ايجَا .. راهُو البُعْدْ يكْوِينِي .. على حكايتْنَا و بِنْتنَا وصِّينِي .. إيجاَ .. أقرُبْلِي ،، اسمَعْنِي ،، اقرالِي و ما تلُومنِيشْ .. عالكِتِيبَةْ ما توقَفْنِيشْ .. و علَى فرْحتِي بِيكْ ما تِكْبِيتْنِيشْ !

ايجَا و من حياَتِي ما تِمْشيشْ .. و منْ عشْرِتْنا ما تِحْرِمْنيشْ .. راكْ خلِيلِي مِنِّكْ ما تقصْفْنيشْ .. نِحِبْ نحْكِي علِيكْ ما تسكَتْنِيشْ .. و نِحِبْ نغيرْ ما تُبْخصْنِيشْ .. ياخِي مِشْ انتِ قُتْلِي شِنْكَمْلُوهَا الثنِيَّةْ ما تخَوفْنِيشْ ..

ايجا و بالغُرْبَةْ ما تحسَسْنِيشْ .. و مرارةْ الفُرْڤةْ ما تذوَقْنِيشْ .. و كبدتي علِيكْ ما تِشْولِيشْ .. و في عيشْتِي ما تمرَرْنِيشْ ..

ايجَا .. ما تِمْرِيجْنِيشْ و فِي المحَبَّةْ ما تكَرَهْنِيشْ ! أمَا ..

إيجَا نقُلِّكْ حاجَةْ .. الحدِيثْ هذَا كتِبْتُو في اللِّيلْ و كلاَمْ اللِّيلْ مدْهُونْ بالزِبْدَةْ ! علَى خَاطِرْ بُعْدِكْ ما يُقْتِلْنِيشْ .. و علَى أحلامِي ما يبَعَدْنِيشْ .. و الضُحْكَةْ من شفَايْفِي ما يِمْحِلِيشْ .. و الحبَارْ في ستِيلُويَا ما يُوفَالِيشْ .. علَى خاطِرْ أنَا كيفْ نبْعِدْ نِتْقهَرْ أمَا ما نوَلِّيْش .. تعرِفْ إلِّي تهديدكْ ما يِرْعبْنِيشْ ..

أنا بنَيَّةْ و بِيكْ والَا بلَاشْ نِعِيشْ