إنت موش أنا

Ghada Triki - غادة التريكي

إنت أقرب حاجة ليا .. وإن نمشي إتباع فيا ..

لا إنتي تنجم تسيبني، لا انا نجم نخليك ..

ملي حالة عيني لقيتك فيا ..

أما بعد لعمر إلي عديناه مع بعضنا مانجمنش نتبعوا فرد ثنية ..

في كل فرحة نلقاك غصة، في كل ضحكة نلقاك دمعة

في كل حاجة بيضة نلقاك نكتة كحلة..

فوق عيني ضبابة و فوق فمي عصابة ..

فوق قلبي غيمة كحلة مليانة بالمطر، مرة تجي لعاصفة قوية و مرة تتعدى كيف عرس الذيب ..

في كل نور ظلام ..

في عز الدنيا تفكرني بالموت .. هي تحب الموت ..

الموت يرتح الروح ملبدن زعمة يرتحني أنا منك ..

أما نحب نعيش والموت عشقتي..

في كل لمة وحدة ..

و أنا في عز اللمة تجيني كيف الحجاب تخليني نفكر فيك و في مشاكلك و همك ..

أما زادة في فرحك و حلمك ..

مع العباد، المخ فارغ.. أما كيف نبدا وحدي معاك تجوجمني بكلامك .. كلام يرهوج يخليني ضايعة ..

في كل وردة شوكة ..

في عز الحلمة تفكرني بالواقع ..

تفيقني تضربني .. فيق راهي دنيا في الأرض موش في السما ..

هبط عينيك وغزر قدامك، لا اطيح في الحفر إلي مليانة بيهم الثنية ..

أما أنا نحب نطير وقتها نمشي في ثنية بالورد مرمية ..

في وسط لكلام تجيني غصة تسكتني ..أسكت لكلام يخليك تعاني ..

نحب نتكلم نصيح .. يسمع لبحر أسراري و يحمل الريح أخباري..

في عز الفرحة تجيني غمة.. تفكرني بالهم ..

نحب نفرح و نرتاح ..أما الدنيا موش متاع راحة ..

هذا الكل وأحنا مابعدهنا عايشين إلي يرانا يقول علينا واحد ..

خليهم يشوفونا واحد ..

خلي سرنا لينا.. أنا إنت أما إنت موش أنا ..

بقلم غادة التريكي