إلى أم الشهيد
Ameni Oueslati - أماني الوسلاتي
ما تبكيش ... الغالي مات شهيد
ما تبكيش … الليلة عندك عيد
ما تبكيش على كبدتك إلي مات راجل
!! أما ابكي علي عايشين و ما يسواوش حتى ربع راجل
ولدك إلي بعثتو و راسك عالي بش يحمي بلادو
غدوة ربي يخذلو حقو من جلادو
!! راسك يا ميمة لازمو يقعد لفوق و ربي يخلص الحقوق
نحبك قوية قدام الصندوق إلي داخل للدار
صندوق ولدك عمرو ما يجيب العار
صندوق ولدك مغطي بعلم بلادو
علم ماتو على خاطرو أجدادو
!! علم تونس إلي غالية علينا و كلنا حاطينو في قلوبنا و عنينا
نكتب عليك و في قلبي وجيعة
قلبي يغلي حزن و ليعة
أما مانيش بش نبكي و لربي العالي بش نشكي
يحميلي بلادي و رجالها ندعي
و إلي كان سبب نتحي
إنت ليوم أمنا لكل و بش ناقفوا معاك لكل
ولدك خلالنا أمانة بين يدينا-
وصانا على دمعتك العزيزة علينا
وصانا على دعوتك بالرحمة ليه و لينا
وصانا على بوستك الحنينة
... يا أم الشهيد ربي يفضلك لينا
الله يرحمهم
أماني الوسلاتي
Website Design Brisbane