داار الوقت و رجعت نكتب بعد ما قلت لا انا قد روحي  و منيش مستحقة نخرج كلامي في شكل حروف نحكي بيها لي نحس فيه اما اللي نحس فيه هو لي خلاني نرجع نكتب.. Correlation في الكلام و ال principe واحد.. اللي الوجيعة هي السبب في كوني نحل ميساج فارغ نعبيه باللي يدور فيا من داخل.. اما انا توا  نحب نشد امي نحطها بجنبي نقلها علاه؟ علاه في العموم هكاكا و نشوفها شنية اول حاجة بش تقولها علا اساس انها اجابة للي سألتوا.. امي عمروا ماهو بش يجي لبالها لي انا نحب نقلها علاه ربيتنا التربية هاذي الكل و علاه علمتنا نكونوا عباد في وقت معبي بالحيوانات الي تبني فرحتها فوق دموعنا...

نحب نسألها  علاه ما جاش لبالها الي احنا في وقت ميستحقش  حنية و تربية و قدر و راس مطبس ما يستحقش تحب فيه بالبرشة و تعطي من روحك و تسكر فمك المهم الي قدامك يتبسم.. أمي زادة مازال نافيبالهاش الي توا يلزمنا نعيشوا كلااب  نغدروا لي حاسبنا صاحب و نخونوا الي حاسبنا حبيب.. ما فيبالهاش اللي هذا اقرب طريق بش الواحد يحمي روحوا مسكينة هيا زادة في العمر هذا  و قاعدة تتعلم.. اما لي اصلوا ذهب عمروا ما يصدد بلي تعدا علاها ديما تخلي على ربي و معزها كيف تقول اجعل وجيعتي دواء لبنياتي و محلاها كيف ماتكافيش خاترها تخمم في نهار اخر عليا انا و اختي...

نتفكر كيف علمتني امي نقسم حاجتي مع الغير  خاتروا مستحقها و نراه يفرح و نربح محبة ربي و مبعد محبة العبد اذااك و مالحوايج لي علمتني نقسمها هي قلبي و فرحتي  اللي هوما اكثر حاحتين خاسرتهم كل ما نزيد نهار ا.. نتفكر زادة كيفاه علمتني نطيح من روحي و من قيمتي و مانعاملش بالمثل خاتر رباتنا اللي الهناء ما يجيش بالساهل و راحة البال تجي بعد تعب... امي غرست فينا معنى المحاولة.. علمتني نحاول نطلع وحدي نقرا وحدي نخدم وحدي نخمم وحدي  نتضر و تغيضني و يتكسر قلبي  و نعدي و نحمل و نتحمل #وحدي  علمتني نكون مرا نهنيها في قرايتي في خلطتي في تخمامي.. نهنااها في غياابها.. علمتني نشد الحاجة نحاول نصلحها لآخر نفس فياا... اما مافيبالهاش قداه طريقي كان صعيب و انا نحااول نبدل من عبد.. قدااه بكييت و رضيتها في روحي بش فاللخر يتصلح  اللي قداامي..

علمتناا نحبوا عبد كيما هيا حبت بابا اما ما فيبالهاش الي وقتها و وقتنا ماهمش كيفكيف.. مافيبلهاش اللي بابا قبل كان يغيب بالاشهرة  هي عينيه و هوا روحها و مافيبلهاش اللي توا تغيب لحظة تتفك بلاصتك هذا كان غبت   ماتعرفش اللي الواحد يتصارع بش يفك بلاصتوا فاللخر يسلم فيه اكا العبد الي عمرك ما تتصورها منوا... ربي يهديها معلمتناش نكونوا بدالين لأصحاب و للاحباب.. خلاتنا نتعلقوا فيسع و رباتنا بالنية .. تعبتناا ياامي..   كان تعرف قدااه الواحد مهمش من داخل قدااه دنيا تهز فيه و تنفض وين جاا و تخليلوا في اماارة اما يا امي الامارة انتي ما تشوفهاش خاترها من داخل.. انتي ترا كان في الضحكة مع كلمة صبااح الخير  الكبر يا امي عاونني عليك... خاترك معادش تثبت في عينيا فيهم دموغ ولا لا... وليت تصدقني كي نقلك حساسية مالطقس  على فكرة يا امي الطقس عندي ديما خريف... تربيتك الي رابطتني و متعبتني مخيلتلي الطقس ديما حزين كيف الخريف... كان تعرف اللي صاير فيا و اللي عديتوا يامي متسامحش روحك مازال اصل هوا توا ياا؟ انت السبب يا امي...