في ليلة من ليالي الصيف, طمبك اوسو, طلعتلي الكلبة بنت الكلب, هزيت روحي, شديت ثنية ما نعرفش وين بش توصلني, ماشية وين بش تهزني ساقي, ما نعرفش ... قداش مشيت, دقايق ولا حتى يمكن سوايع, سارحة في الدنيا في العباد و في روحي

نلقى روحي على حرف الشط, بلاصة يقصدوها إلي يحبو ينساو, انا ضايعة بين إلي نحب ننساه و إلي نحب نتفكرو, لا استحقيت لا سيغارو لا دبوزة بش نتفكر. خزرت للسماء, نلقاها مرصعة بالنجوم, يلمعو كيف اللويز, نخزر الوحدة ننسى الاخرى, كل وحدة تحكي حكاية, كل وحدة وراها رواية. الحس بايت و انا هاذاك اش نحب, مانيش خايفة من الضلام و مانيش خايفة من حس الموج إلي يهز فيا و يجيب معاه. بالعكس نحس في الموج يدغدغ فيا, يبربش فيا, يجبد فيا بش نحكي و نفرغ قليبي إلي ! جابني الليلة . و اش يحير مواجع الموج

******

مع الموجة الأولى, تفكرت إلي في نهار من النهارات خسرت عبد عزيز علي, عبد دللني وكلني و شربني, عمرو ما قالي لا, عبد نحى من لحمو و عطاني, عبد حطني على حجرو و حكالي حكاية حتى هزني النوم, عبد مشى من غير ما يشاورني, ما خلنيش حتى نسلم عليه ولا نقلو قداش نحبو … أما علمني نعيش ! مسحت دمعتي و هزتها الموجة

******

مع الموجة الثانية, تفكرت عبد حكيتلو أسراري, رقدتو في فرشي و كلينا فرد صحن, عبد بكاني و ضحكني, سبني و عايرني, أما نعرفو كان يحبني, عبد بعيد عليا أما .نعرفو يسال عليا, قلبي و الناس يقولولي. زعمة يجي نهار و يرجع ؟ مشيت وحدك أرجع وحدك

******

مع الموجة الثالثة, تنهدت, تفكرت عبد ما نحبوش, يمكن حتى ناقمة عليه, الله غالب هو لزني, عبد كبرت معاه, خرجنا, لعبنا, ضحكنا, فدلكنا, كلينا, شربنا, حلفنا .لبعضنا ما نتفارقوش, حلفلنا لبعضنا ما تفرقنا كان الموت, مازلنا حايين أما تفرقنا, ما نعرفش شنوة حوالو أما انا هكا خير

******

مع الموجة الرابعة, هزيت عيني للسماء, فقت إلي حياتنا موش مربوطة بعباد, حياتنا دروس, مرة تضحكلك و مرة تدور عليك, مرة تعلمك و مرة تضحك عليك, الدنيا ما تاقفش أما انا لازمني ناقف على ساقيا, عباد حبيناهم و مشاو و عباد يحبونا و احنا ماناش حاسين بيهم, عباد تكرهنا و عباد تتمنالنا كل خير, عباد تدعيلنا و عباد تدعي علينا. عباد عاشوا معنا و توة يدوروا

وجوهم منا و عباد قابلناهم صدفة و في نهار ولاو منا. الدنيا محطة و عبادها ماشية جاية, الموج ما يوفاش و العباد ما ... تعياش و كل واحد و مغرفتو اش هزت