أحنا

Oumayma Rjeb - أميمة رجب

أحنا هاكم متع العشرة ;

متع الجار يحلك باب داروا وقت الغصرة ;

متع الضحكة المزيانة موش القحرة ..

أحنا الحزارة; أحنا اليسمينة الفاوحة و النوارة

أحنا ناس الزمان في قلوبهم خلى أمارة ..

أحنا الحنية و الصبية المرتوبة المقدية ;

و ريحة نوار عشية ;

أحنا الزين و العينين ;

أحنا الضحكة في الفم و القلب حزين ;

أحنا الوهرة و اللمة المزيانة و السهرة ;

أحنا الحومة العربي و بنتها ;

أحنا الجبة و التخليلة ووهرتها ;

أحنا الزين و كحل العنين ;

أحنا الي ما تغلبنا الأيام و السنين ;

احنا الحشمة و في القلب أسامي وشمة ;

أحنا العيشة و الدنيا أحنا فقارا و بمخاخنا غنيا ;

أحنا بنت الرجال و الذكر الي ما يضيق في السروال ;

أحنا الركشة و القعدات ;

احنا الحكايات المزيانة الي ما تتنسى بالأيمات ;

احنا متع الفزاني و الراجل الزهواني ;

و الشطحة و العرس في البطحة ;

أحنا متع صليحة و بوشناق ;

أحنا الي بايعينها بلفتة و الزهر الي ما فاق..

أحنا البر و البحر و العين الي تعبها السهر ;

أحنا الكلمة الطيبة و للكبير ياسر قدر ..

أحنا النسمة و الريح ;أحنا فرحة لين الليل يطيح ;

أحنا بنة و ريحة بيناتنا تفيح ..

أحنا هنا و غادي ;

أحنا ميزيريا و خنقة و عادي ..

أحنا لبارح و توة و غدوة ;

أحنا وردة بايتة في الندوة ;

أحنا حلو العيد كي في الدار مع العمة و الخالة يتحل ;

و الدوارة الي في دار الجد تتعمل ..

أحنا رمضان و البريكة ;

أحنا الزغروطة و الفوشيكة ..

أحنا السفساري والعركة بين الملاك و الكاري ;

و التكويرة وزينة التصويرة ..

أحنا سبت عشية و أحد ;

أحنا حب و صدري يصد ;

أحنا هاكم الباهين الطيبين المزيانين الي متبدلهم السنين ;

أحنا وجيعة و ليعة أما مكملين و عالدنيا بالعاني عاملين ..

أميمة رجب

Website Design Brisbane