الوقت..الثمنية متع اليل..البلاصة..شارع باريس..التاريخ..12 ديسمبر 2016..الطقس..ليلة من اليالي الباردة.. الشوارع فارغة.. واحشة..حتى القطاطس راكشين في الخرب.. نفس الشارع كان يغْلي بالناس لي تزرب مروّحة لدارها..لعشّْ دافي ينسِّيها في تعب نهار قَاسي..في مشاكل ما توفاش...

في دنيا ولاَّت صْعيبة عالناس.. لي عندو كرهبة راو شاريها بالقرض و الي يقرِّي في اولادو في البْريفي يوصل لاخر الشهر يغفّْق..الطبيب لي ديما في مخّنا غْني و يصوِّر في الفلوس ولَّى يقْعد بالاعوام بطَّال و الاَّ يخدم محْقور..و الاَّ ينْفيوَهْ في قاع الوْقيع بعيد على البلاصة لي نابتة فيها عروقو.."في مناطق الظل"..

و كان يتْكلم يولِّي ما يحبش يخدم بْلادو..اما يتْنفَى على العْزاز عليه ميسالش..اماهي بلاد لي يحبُّوهم يخْدموها؟؟ الي الانجنيور فيها  يخدم تحت واحد بو كرش بْهيم يعرف كان يحسب الفلوس..اما على خاطر البو كرش عندو فلوس..و بالرغم قاري للسنة رابعة دل..السيد يعفس في الناس لي تْسلّْت عروقها بش تقرى..في بلاد القراية فيها معاش توصلك بش تاخو حقوقك..اما التقْحيف يوصل..

الثمنية متع اليل..و بالرغم من كل شيء..الناس الكل فرحانة مروحة لديارها..وفي الديار..اسرار.. وورى البواب المغلقة..حكايات مفرقة.. الناس الكل عندها هموم..اما يحلوها في الدفا..تحت الفراشية.مقابل التلفزة..الناس الكل تتعارك مع نساهاو الا رجالها و الا بوها و امها..اما على طاولة منصوبة و ماكلة تدفي المعدة..يتعاركوا و في يديهم كاس تاي..و شوفاج يشعل من غادي..يتعاركوا..يمكن..عندهم مشاكل..يمكن..ناقصين فلوس..يمكن..اما في اخر اليل و كي يْبات الحس..الناس الكل تحت البطانيات الحنينة ..كان هو..

هو..

هو يشوف الناس كيفاه تعدي نهارها..السبعة متع الصباح..كراهب تزمر..محطة الميترو تغلي..مافماش ميتروات..الكيران تتعدى مايلة على قد ماهي غاصَّة بالعباد لي راكْبين فوق بعضهم.. الناس تتْعدى تزرب في مشيتها..تزرب لدرجة ما يشوفوهش..هو....

العَشرة..الناس هابطة تقْضي في قضياتهم

نص النهار..الشارع معبي..الناس الكل ماشين يفطروا..الريستورونات تعجعج

الاربعة..الشارع معبي..الناس خارجين مالخدمة و الا يحوْسوا..باقي يزربوا..لتو لا تلفَّتلُو حد

الستّة متع العشية..الشارع معبي..المحطة معبّْية..ما فمّاش ميتروات..الكيران مايْلة..الكراهب تزمِّر..باقي ما شافوا حد

و الا يمكن عملوا رواحهم ما شافوهش

الثمنية..الشوارع مْصَفِصْفَة..وينهم الناس..شبيه هو مازال غادي..على بلاصتو

خاطر ماعندوش وين يروح

علاه؟؟

خاطر الدنيا خايبة..و الناس خايبين..خاطر وفات فلوسو..و طيّْشوه اقرب الناس ليه..خاطر بلادو ماعندهاش جَاش بش تتلهى بالبرشة ناس الي كيفو.. فما كيفو في كل شارع..في نهج

لندرة و باب بحر و الحبيب بورقيبة و لافايات و شارع لبنان و باب دزيرة.. كل واحد و حكايتو..و هو،كي يتفكر..كان بْقالو مخ بش يتفكر..كيفاه كان..قداه تنجم تكون الدنيا غدارة.. كيفاه وصل

يسكن في الشارع..جيعان بردان..لابس كبوط قديم..مِتوسّد كرْذونة..متْغطي ببطانية هزّْها مالزبلة.. ياكل من فضْلة الريستورونات و ساعات يتْكيِّف عْقاب سيقارو لوّْحو  واحد مزْروب..و يُشرب عْقاب قهوة خلاّها مولاها فوق السُّور..لاسباب مجهولة..

12 ديسمبر ليلة باردة..الشّْتا تصب..قعد يلوج يلقاش بَالاَصْ محلول..شيْء..دْخل لقهوة..طرّدوه..تْخبى تحت برطال..الدنيا ياسر باردة..الشتا تصب..

محلاها الشتا كي تصب..كي تغزرلها من ورى الشباك و في يدك قهيوة دافية..محلاها كي تمشي تحتها معنكشة في منعرفش شكون..لابسة قَلْصِكْ الكل و صبَّاط ما يدخلش الماء و سحابة غالية مكتوب عليها "زاغا"   

اما ليه هو مش محلاها..مقْساها..و ماكْسح قلبها..و مَا شْمتها..الثلج ولى يصب..صْغير شدّْ في بوه بش يخرج يشوف الثلج.. و بْنية تعيط لاخواتها بش يجيو يشوفوا الثلج

و هو..

تمنيت نقلكم الي فما شكون حَلُّو الباب و دخلوا من السْقُنطري..و الاَّ شكون وقَّفلوا الكرهبة و طلِّعوا و هزُّوا معاه..اما براس امكم تصير هاذي؟؟ ما تصيرش اكيد..

كانت ليلة صعيبة عليه..زرقت عليه الشمس..وجهو يضحك..حركة لا..ماقامش..خاطر ماعندوش وين يغسل وجهو..و على خاطر ما يعرفش البْتي داج..و ما عندوش كرهبة يمشي فيها للخدمة و ماعندوش خدمة..شكون بش يخدم واحد مريض،يسكن في الشارع،نكرة.. علاه تحبُّوه يقوم..يمكن صاحب الامانة هزّْ امانتو..وين ينجّم يلقى الدّفا..و ما يتعداوش الناس كاينهم ما شافوهش..في بلاصة مافيهاش ناس يخافوا يزوّْزوا اس دس اف لدارهم.. و يتْقَرنطوا بش يطيّْشولوا كبوط قديم..و يلوحوا شطر عشاهم في الزبلة و ما يعطيوهش لراجل بايت جيعان..يمكن

مشى لبلاصة  ما يتظْلم فيها حد..و ما يغْزرولوش الناس و يشمإزوا

يمكن مات ليلتها..كي كلْب الخْرب.. و يمكن هزوه البوليسية و طيّْشوه في جرد حفرة.. و يمكن قام كمل نهارو..كي البارح..كي اليوم..كي غدوة..روتين قاتل..مش كالروتين متاعكم..روتين يقتل بالحق

في بلاد فيها ناس المْخَيِّر فيهم مالعام للعام يلمّْ طرف فلوس بش يهز بطَّانية لناس عايشين في عشَّة..بش يموتوا مالبرد خاطر صبت الشتا و تْبلوا..بش يموتوا وهوما متلَحفين البطانية متاعكم..و في معدتهم المقرونة و الطماطم الي جبْتوهملهم..

في بلاد..و الا اشْ مدخلها البلاد.. الداء الكلو في العباد..فيك..فيكم..فينا..فيهم..فيه..فيَّا انا..خاطر حتى انا كتبت النص هذا تحت الفراشية..و في يدي قهوة دافية..

__________________________________

هذا النص هو من مَحض الخيال و اي تشابه في الوقائع هو مجرد صدفة.. و الا انت تستخايل..سيدي القارئ..