جوري حبيبة امك ..

عسلامة يا روحي .. عندي برشا محكيتش معاك الله غالب ماك تعرف لاهية في القراية و مشاغل الدنيا كثرو عليا ..

عالوضع لي نرا فيه قدامي هالايامات في المجتمع لي بش تترعرع انت فيه حبيت نحكي معاك ..

بنتي حبيبتي انا بش نجيبك لدنيا و بش نعطيك فرصة بش تكبر و تعيش كبرك و صغرك على كيفك ..

منيش بش نفرض عليك حتى شي .. اما انا بش نكون ايدك الايمين و ننصحك في كل غصرة ..

منيش بش نفرض عليك عقيدة دينية انت مكش راضية باها ولا نفرض عليك تلبس ولا تنحي الحجاب ولا لازمك تبع دين امك و بوك و جدك و خوك ..

صحيح امك مهيش متمكنة من دينها و موشمة و محجمة شعرها و عاملة piercings ..

صحيح امك متصليش و مهيش قايمة بواجباتها الدينية .. اما حبي لربي كبير خاطر هو كانلي اليد لي تفرشلي حرير عالحديد ..

و انا اصلا منيش بش نقلك كون كيفي ولا متكونش .. انا بش نخليك على هواك نخليك تفهم الدنيا و تعرف الغالط مالصحيح ..

اما تهنى بش نلقفك في كل طيحة و منخليكش تتضر ..

انا منعرفش انت كيفاش بش تخمم ولا كيفاش بش تعيش ..

ممكن تكون ملحدة ولا مسلمة ولا مسيحية .. ممكن تكون قارية و متثقفة و واعية ولا تكون فاهمة بالغالط الحرية ..

بش نخليك تعيش لحضة اختياراتك و منيش بش نمنعك ..

اما تأكد انك بش تجيك نهار و ترجع لكلامي و تقول لي عملاتو ماما من غلط ملازمنيش انا نعاودو ..

حبيت نقلك قبل ما نودعك انا بش نقبل بيك مهما كانت ميولاتك و عقيدتك و اختياراتك و بش نكونلك منبع النصيحة ...

نحبك يا اغلى ما عندي ...