نحبك  اما خايفة مالخوف ..خوف حب من طرف واحد  مش زوز طروف ..وقتها يولي حب قلق و كيوف..نحبك خاتر في ليلة ظالمة منسية حيية نار خامدة فيا ...حكينا للصبحية و ماخممتش حتى نرمش عينيا...قداه صعبت عليا كي نراك نبدل الثنية ..كي نتوحشك و ما تحسش بيا ...قداه وليت نرقد باش نراك في احلامي و نتخيل حكايات على الفرحة مبنية..قداه نحبك قداه نتمنك اما قداه باش نستناك؟

نستناك لين تطيح العينين و تخيخ الساقين ..نستناك ترجع هايم و في الحب عايم،ترجعلي نوشوشلك في وذنيك نقشعرلك بدنك و نسكن فيك ..

تاعبة مدقدقة تقول طايحة من سابع سما ...اما عندي الدواء ...دوايا تحريكة شفايفك البنينة الي تحركني من هاكا التركينة الحزينة، تركينة حكايتي معاك الي ما نعرفش منين نبداها ،الي كي نجي نحكاها نتلعثم و ننساها..حتى الكلام يولي مخنوق مش منطوق ...

نحصر دمعتي بين عينيا نفول شنيا هالكلام و اش وصلنا لهالثنية ؟

مافيبالوش بالك كان نقولو تتعانق القلوب و يتلاقى المكتوب ...اما شنحكي شنقول؟ نقول هاك الطفل مكني و سكني أما معرفتش علاه..علاه مانتلاقاوش كالشمس و الهلال.. زعما مني والا دلال؟

نحكي على شهوتي شهوة صبية تبات الليل تحلم بيك تدعي لربي لا ينحيك ..كان تلقا تهرب بيك و حتى اسمك تنسيك تكون لها و هيا ليك...نحبك و المحبة عندي جديدة نحبك و الاسباب عديدة ، نحبك و يوفا الكلام نحبك و السلام...