صورتها عملتلي في مخي خوماضه .. شغشبِتني ، بهذلِتني و بدلِتني ، مالمِلّة خرجتني و في الحِلّة دخلتني ..

في مخّي صورتها بَدّالة ، عين حبارى و عين مِذباله ، شهلا قَحرِتها تِسحِر مسرارة ..

نراها نضيع ، نترهوج و ندوخ نضيع فالثّنيّة ..نعطيها سكرة و نغمّض عينيّا ..

فشعرِك المخبّل سايِح و في روحك الخفيفه رايح ..

في البحر موجودْ و عالحِجرِك مَمدودْ و نِجبِد العود و نحفلوها للصباح و نغطسو في العِز للعنكوش ..

تي طز منين العِز و إنتِ الحل و المُشكُل ، انتِ الحرّيه و الرّبطيّة و في غناية تولّي اللاّزمه الشّعريّة .. و احنا في الهم للكرومه ..

قلي منين الهربه منّك ليك ! و انتِ لا نحبّك لا نصبر عليك !

ندور ندوور و ندور و نرجع ليك .. و في لخّر حِل الصّرة تلقى خيط ..

آنا مِمّن بيك و كافِر بيهم ..

عينيك رَكعه ما تِكفيهُم و انتِ بدّالة و منّاية و نسّاية و في حاجتِك تولّي شكّاية و بكّاية ..

و انا لرايِك خاضع و لقَرارِك طايَع و في وصلِك طامَع ..

إنتِ ليلى و انا المجنون ، مسجون بحبّك و مِبلي ، هايِم ، نِشعِرلِك و في غرامي ليك نصوّرلِك ، حتّى كان خُنتي نِغفِرلك و على حبّك مانتوب ..

عسلامة ولا بِسلامه !!!