Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
طفلة الأربعين..
Ghada Ben Salah - غادة بن صالح
يقولولي مزيانة، ألف راجل يتمناك،
حليلتك والكل يجري وراء رضاك،
بدنك يشهي،
مخك يبكي،
وقلبك مفماش منه اثنين،
يقولولي انت مرا للة النساء
،غزرة منك تشفي،
وبسمتك هي الدواء،
يقولولي راك باهية،
وسعدك يجري وراك،
وراجل الأحلام مد يدك تلقاه بحذاك،
أقرا، وانجح واكبر وتو تشوف،
إلا منعرسولك بالحضرة والدربوكة والمالوف،
أقرا بش تكون ذكية،
وراهو العرس حق مش مزية،
كبرت وانا نرمي في شعري على اليمين واليسار،
أنا للة الدنيا، ضحكتي تخلي الليل نهار،
قريت، عرفت، شفت جربت،
وأول واحد باسني نسخالو هو الموعود،
جاء وراه الثاني، وبديت نحلم بالوعود،
خلط الثالث والرابع، والعاشر،
كلهم يقولوا نفس الكلام،
مزيانة، قوية وعليك الكلام
إيجا معايا،
أنا نحبك ونعزك وندللك وعليك الأمان،
وانا نمشي، ونتبع، ونفرح بش نتكب
ونرجع نبكي ونتخبى في فرشي
ونسأل شنية السبب،
اليوم أنا عمري أربعين،
معرستش مجبتش من الأولاد اثنين،
متهنيتش كيما اندادي،
بنت الجيران،وبنت الجزار
والأخرى أم وذنين
ملبستش الروبة البيضة،
ومحضرتش دبش النوم،
وأمي تتشفع من ولي لولي،
وبابا يتنهد وويلقي علي اللوم،
وإخواتي يتراناو على الحزارة،
أنا وليت خديمة وبايرة وشكارة،
اللي يجي يرمي فيها اللي يحب،
,وانا لازمني نسكت، أنا بارية، وحرفة،
الله غالب قارية ومزيانة لكن نواصي وعتب،
حد ما را قرايتي ونجاحي،
حد ما را خدمتي ووهرتي،
حد ما فرح لقوتي وفلاحي،
الكلهم راوني ناقصة،
خاتر بلاش راجل،
الكل راوني أنثى ضعيفة،
واللي نعمل فيه الكل باطل،
ومن هذا الكل،
أنا طفلة الأربعين،
أنا وين؟؟
وليت أنا اللي نشري الرجال بفلوسي،
وأنا اللي نقول إيجا إلى الدلال والعز وعليك الأمان،
أنا اللي قلبت الزمان،
وكيف يجي سي الشباب،
نبدا نتعزز ونتدلل،
وفي الجنة نحل ألف ذراع،
وكيف يقرب للعين نسكر عليه البيبان،
ونخليه ملوح كيف السكران،
ووليت أنا اللي نلوح، وأنا اللي نختار،
الرجال زادو هبلوا،
أما أنا مهمنيش،
وقتلي كنت صبية،
حد ما حب يعرس بي،
وكلهم قالوا مزلت صغيرة،
وكيف كبرت،
اللي يقولي منيش حاضر،
واللي يقولي متخدمش،
واللي يقولي تعرفش طيب،
واللي يقولي إيجا عندي متحشمش..
أنا تو في آخر الأربعين،
خليت دارنا وحومتنا،
ومشيت طلعت الفوق،
سكنت في دار كبيرة،
فيها حتى حليب النوق،
فيها الزين والعين، والعز،
وكل نا تشتهي تراه وتذوق،
لكن فيها مرا وحدها،
بلا راجل،تعرس ليلة برك،
وفي الصباح الراجل يموت..
بقلم غادة بن صالح
Website Design Brisbane
Tags: