دعنا نتزّوج يا مقراني ...

دعنا نتزوج من غير لا نستدعاو حتى كربي ... وكان جاو وحدهم ما يلّكوا من عنا شي لا روزاطة لا بقلاوة  ...خلّي ينبّرو جواعة ... خلّي يطيحلهم السكر يا مقراني الله لا يفكٍّر بيهم ....

خلينا نفرحو وحدنا يا مقراني ... في بلاصة ما يعرفنا فيها حد ... و من غير لبني بن عمار تنكحنا في ملاين زقحة ... مكيجلي انت يا مقراني ... بوسني تو نزيان ... عنقني تو يستوى الآيلاينر من عند ربي ... و اخطفني و انا متعدية من قدامك تو الحبّ يعملّي مشطة وحدو وحدو ... و يركبّلي فو سيل ...  

جيبلنا أي عدول بهيم يحطلنا هاك الكراسة و نبصمو في بلاصة ما نصححو .. بالعشرة الي انا نحبك و نحب نعيش معاك ... بالعشرة الي انت بش تقعد كل ماتبعد تتوحشني و كل ما تراني تراني كاينها أول مرة ... والي بش نقعد  نشوف هاك الخوف الي ريتو  في عينيك نهارت الي مرضتلك و ما عرفتش اش تعمل فيا ...

نبصمو وما نصححوش .. التصحاح طلع أحرف يا مقراني .. أحرف و متع شيكات ... ومتع كان تحبني اشريلي .. و هاوكا نحبك ياخي شريتلك ... وهاوكا شريتلك يعني نحبك  
دعنا يا مقراني نحبّو وما نعرّسوش ... نهبلو و ما نفيقوش ... و نكملو عمرنا مهبّلة نخرجو من فرشنا بعد ماضي في طمبك دجمبر و نهبطو لشط المرسى نتفرشو عالرملة و نغزرو للقمرة ... و ما على بالناش باللي نصبحو نخدمو من غدوة  الصباح .... اش بش يصبّرنا على هم الدنيا يا مقراني كان نكملو عمرنا نرقدو بكري خاطر نصبحو نخدمو و نفيقو بكري خاطر نصبحو نخدمو ... و ما نعملو شي خاطر نصبحو نخدمو ...

دعنا نمارس انسانيتنا و نمشيو للخدمة بخدود حمر من سهرية البارح و ببلاصة عضّة و لا زوز اخر الرقبة ... تو نشربو قهوة و نفيقو ... و نربحو بأزيد تصويرة في قجر سوفونيراتنا ...
هيا يا مقراني نعرّسو من غير كريستال ... و أرجونتيار في التركينة ... و فرش قمراية ... و من الأوسات طزّينة و عشرة  ملاحف تقول بش نكسيو وتيل ... هيا نعرّسو من غير زوز كراظن كبار معبين بالطناجر و القلايات الي نموتو قبل ما انحيولهم التيكيات ... هيا نعرّسو بلاش خواتم و صياغات ... بلاش كوواتات و زرابي و موكاتات ... هيا نعرسو من غير لا نمشيو لمعرض الشرقية متع المفروشات ... و من غير لا تبكّيني أمك و ينبزك بابا ... هيا  نعرّسو بلاش حتى شي و خلي نقعدو حديث يعديو بينا التاي في العشويات ..  

دعنا نتزوج يا مقراني ... بلاش الحجامة الفلانية و المصوّر الفلاني ... و من غير لا يدبّرو  على والدين تصاورنا و يقوللنا عنقو بعضكم و اغزرو لهنا ... دعنا نتزوج و تصاورنا الكل تتاخذ واحنا منفخين بالشتا ... نعرّسو في نوفمبر يا مقراني ... حيث كي نقرسو يكون حضننا هو الحل الوحيد للدفاء ... قبل ما تبرد الدنيا يا مقراني نكونو عملنا برشا مشاريع متع ضنا ...

دعنا نتزوج يا مقراني بين عيد ميلادك و عيد ميلادي ... و نتولدو من الاول و جديد ... و يكون عيد يوليو تلاثة و نقتصدو في المصاريف ... نهديلك كل عام أثناش كادو برك  .. كي سويت نوفمبر ... و أكثر !  

قوللهم ما يعملولناش تعليلة يا مقراني ... قوللهم يدخلونا على غناية ملحم بركات ... و ددّشني  انت يا مقراني و هو يقول :" تعا ننسى يا روحي يا عايش بروحي جروحك و جروحي يشفيها النسيان" ... و مش لازم هاك التخلف متع الحلقة كرب الي دايرة بينا واحنا نشطحو  ... تو ندورو ببعضنا .... تو نغزرلك بأكثر من عين ... تو نشوفك كيما عديت عمري الكل نشوفك :  امي و خواتي و كوزيناتي و الجيران ... و من غير لا يفرحولنا ... لا جعلتهم فرحولنا  ... ما لقيناهمش في الوجيعة يا مقراني ... و كي تكبينا و كي تشوينا و كي تعذبنا و كي تمرمدنا و كي رقدنا نبكيو ... ما عنقنا حد و ما طبطب حد فيهم على كتافنا ... جايينا تو علاش ؟ بش يفرحولنا ؟ ما يفرحوش العباد للي طلع أشجع منهم يا مقراني ... يخافو منو و يكرهوه ... و يقولو عليه كلام ما فماش منو ...

”تعا ننسى الي حوالينا .. كل الي حكيو علينا و الي بكّو عينينا .. تعا ننسى تعا ننسى“  

هاللي بش يفرحولنا غارقين في الهم لعينيهم يا مقراني ... مبقبقين في النمطية .. يعيشو و ياكلو و يلبسو كي بعضهم .. يخافو من الهبلة يا مقراني ... ما يحبوش شكون يفكرهم الي هوما في الخز لعينيهم ... ما يحبوش يراو عوجهم في فرحة عينينا ... و احنا عينينا بوفضوح ... طلع  ما يتخباش الحب ... ما  تتخبى كان  الوجيعة ... و احنا يزينا  .. تززّينا  ... يزي ما تشوينا و خبّينا ...  ايجا نفرحو فرحة العمر ... بلا حس بلا عينين بلا كثر يدين .. بلا لوبيا بلا طاجين ... بلا هاتلي لحمة لولدي ما كلاش ... و لاخر تعدى من قدامو طبق السيتروناد و ما خذاش ...  عدينا عمرنا نجبرو في الخواطر ... و نفرّحو في الي ما فرّحناش ... و نخممو عاللي ما خممش علينا ... مرة هاذي هيا نفكّو و خلي يقولو علينا .. ”هالهموم الي ما قدّرو حد“ ... ”يااااا شوف شوف ما أصح رقعهم ”.. ”يبوس فيها قدام عينينا ”.. ”عباد ماعاش تحشم ”..“ ما قدروناش و ماهمش حاسبينا ”...

مش فرحة العمر ؟ هيا نفرحو كيما يفرّحنا احنا مش كيما يفرحهم هوما .. و خلي يقولو قايمين في اخر العمر يفرحو .. تقول عليها الفرحة عيب ... عنقني و هيا نشمتو فيهم ... على قد ما ستحقيناهم و ما لقيناهمش ... على قد ما كرهناهم .. و كرهنا عيشتهم ... و شبيهتهم ببعضهم ... حبّني يا مقراني شماتة و بالسيف و بالسياسة و عقاب الليل و وجوه صباح في القوايل و الصبحيات البنينة ... حبّني بالعيب الي يكرهوه ... بهاك التعنيقة في الشارع الي ما تجيش .. وقتلي يجي السبان و الضرب و البرد و الصقيع ما بيناتهم ...  حبّني كان جيت نجّم نهزك انا كي نروّحو لبيتنا ...ما ندخلك للدار كان  في حملتي :  محبة عكس و شماتة و خالف تُعرف ...

انت الراجل الوحيد في حياتي الي يستاهل نقوم نشطحلو عقابات الليل ... ونلبّسو و نبرفنلو و نستويلو الكرافات و نبوسو وهو هابط و نبوسو وهو مروح و نبوسو وهو غاطس يخدم ما يرى كان في الدوسسيات ...

تزوجني يا مقراني و أحزر عليا و كسّرلي كرايمي و قلي لا ما نخليكش تمشي كان ساقي ساقك و ما تخلي حد يجبدني بكلمة دونية ... وما تخلي حد يبكيني و يوجعني و قوللهم دمعتها عزيزة عليا ... و حبّني بغزرة و حبني بالغدرة ... و قوّمني من طمبك نومي و قلي قوم نشربو القهوة و نتفرّجو على  صاحب الظلّ الطويل ماك تحبّو ... حبني و امشي معايا للسينما بعد الخدمة ... و أضحك عليا و انا نتشعبط بش انظّف الثريّا  ... و افرش معايا تصاورنا على القاع و ايجا نحكيو على كل وحدة فيهم وحدها ... و احكيلي وجيعتك من نهارت الي تولدت لتو و ما تخبي شي عليا ..  احكيلي عالبوسة الاولى الي سرقتها من فم صبيّة ... و على الجواب الي شدّك بوك تكتب فيه للبلوندا الروسية ... و على غصرة الفلوس الاولانية  .. و العشقة الاولانية ... و السكرة الاولانية ...

حبّني مقراني كيما تعرفني نحب ... و كيما تعرف تحبّ ... جربّ فيا ... ادخل للدنيا بساقك اليمين ... و اسقي الزرع الي من هاك العام  شاح فيا ... حبني بالجهد الي عطاهولك ربي الكل و ما تبخلش عليا ...  حبّني كي الافلام مش كي المسلسلات ... اهبطلي على ركبة و نص و أطلع بهاك الخاتم البنين ... ولبسهولي و دموعي خيطين من السماء هابطين ... مالفرحة قداش من مرة بكيتني ؟ ماعادش يتحسبو يمكن فتنا العشرة مرات...  حبّني .. حبّني  بعد التلاثين حبّني كي نخلط للاربعين ... ارمي ايدك على وسطي و قلي مازلت بش تزيان ... تو تشوف اش يحلى معاك الشي عشرة سنين اخرين ... و خليني نعدي على شيباتك و عينيا شاهلين ... في السر و الكمون ... والوهرة و الشبوبية ... و نقلك كيما نقلك ديما ... كيفاش جابتك أمك ؟ ماابن دين امك  

دعنا نتزوج يا مقراني و ما نذوقولهمش ريحة البقلاوة ... في الدنيا هاذي ما يستاهل ماكلة البقلاوة كان المهبّلة  و المجانين ...   

هيا نهبلو انا و ياك و خليهم  و خليهم هوما رزان عاقلين  ....

”  يداوينا النسيان و نعيش بأمان ااااه تعا ننسى ”