Emna Frawes - آمنة فراوس

سيڨارو في جرت لاخر و قهوة وحدة ملي قعدت كبوسن" نصف نهار ضربت و انا في نفس لبلاصة.وجوه مشات ووجوه جات و عقلي يهز و يجيب مفهمتش روحي فاش سارح  و فاش نخمم... تصويرتها مفارقتنيش...  فكرة السينما إلي طلعتلي بها... فاش قام علاها تستعد فيا... زعمة.... فاقت بيا ليلتها... حست بيا... و شافت في عينيا تصويرتها...شافت الي حاولت نخبيه... لها الدرجة كنت مفضوح...  

تعدات سوايع وأنا في الشارع حيط يهزّ وحيط يجيب... ساقيا تكسرت... ماعادش حاملتني...

تعبت وماعينيش باش أروح... لشكون باش أروح... حتى حيوط الدار كرهتني...ولات أبرد  ملي كانت  عليه... بعد مامشى منها...ولد عمي و  دنيا ... رجعت نعنق في وحدتي... دخلت لدار شبابكها  محلولين على فردة كيما تقول يما...حليت التلفزة...

من chaîne الناسchaîne نلقى فيلم لسعاد حسني  نلقاه في وحدة من القنوات المصرية...منتفكرهاش...اما نتفكر الفيلم  مليح "الساحرة الصغيرة"... خليت يخدم بصوت عالي درت على الشبابك سكرتهم...

حليت لفريجدار... فيه كعبتين طماطم و شوية فلفل....نسيت مقضيتش... كعبات بيرة باردين يشهيو...

عاودت هبط من الدار. مشيت الحماص  اليوم عاطي على عطار...

شريت مشكل من الفواكه الجافة...طويبعات جبن... روحت...

قلت نعملجو إلروحي

تلفزة تخدم قدامي ساكته.

حيطت شوية طربيات ... طرشقت أول كعبة...أول رشفةوكمية... خيالها كح بين عنيا... تعدات عليا سوايع و انا على ه الحالة... سكرت تليفوني...كعبة في جرت لخرة...لين هزني النوم على  بلاصتي...

قمت الصباح كالمجنون... الثمنية متع الصباح ضربت وانامتحركتش...عملت دوش خفيف...بدلت دبشي... خرجت...بن عمي يطلب فيا...

--ألو...

+صباح الخير.

--وينك لابس مجيتش تخدم

+لاهاني في الثنية.

--ياناري عليك ملي خليتك ضعت...

+ضعت وأسكت آه صاحبي...

--أيا اخلط..  خلي نخرج نعمل قهوة... توحشت قعدة معاك.

الحب خذا مني ولد عمي...دنيا معيشت تجربة جديدة... تجربة مفعمة بالحياة...

خطيرة... خطيوة للخدمة لين وصلت... قيدت l présence متاعي ...كلمت بن عمي خرجلي... هزيتُ و مشينا للقهوة.

-أياهات أحكيلي شنوا جديدك؟

كان مانتقابلوش في الخدمة ماتسألش. و ڨعدة الخدمة مش ڨعدة .

++سكت...تبسمت... ماعرفتش... شنجاوب...

كيما خليتني وليد عمي لا جديد يذكر... أنت شعامل... ويني دنيا...توحشتها أكا المهبولة. ولله كانت ماليا علينا الدار.و أنت خليت بلاك عليا.  

--أ نت جابد روحك برشا ياولدي شبيك.؟نحنا متغشين عليك لا تجي و لاطل.

++والله منحبش نقلقكم.

--يزي... بلا طحين... توا هذا كلام و بدا يقول و يقول يهز من و يحط غادي شي يتفهم و شي ما يتفهمش... و انا نضحك... قمت نبوس فيه من راس...