Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
أمَو و لاَ مرتو #2
Wiem Achour - وئام عاشورأختو ...
حبَت تتوسَطلو في معرفة من معارف راجلها ...
تمركي بيها وعليها مزيَة و تربَيها في حجرها ...
أختو ...
مريضة بالحمصة و تلوَج على راس شكون ترمي حجرها ...
وعلى شكون تسيَب همَها و سمَها و قهرها ...
نغَارة شرَانيَة الوجه يضحك وفي القلب غصَتها تزيد تقهرها ...
أمَو...
تحبَ تاخذلو مريَة عاقلة و بنت ناس ... منين تدوَرها تدور ...
لا تنطق ولا تتكلَم و لا تثور و لاتفور ...
أمَو...
تحبَ تاخولو بنيَة أصل تداوي بيها قلب بنيَتها المقهور...
تحرقلها جواجيها بالدَباير و القواعد و تردَلها وردة وجهَا كيف اللَيم المعصور ...
أمَو ...
وليدي وليدي ليَا وحدي ... كان تقعد عاقلة نعطيك منَو شويَه ... وردَ بالك عليه تغور
ردَ بالك تفكَو منَي وتنسى فضلي وعليَه تدور...
أمَو ...
عقليَة مريضة خاربة مبدَلتهاش لا السَنين و لا الدَهور ...
أمَو...
وليدي أخطاك منها طلعت مش هيَه اللَي تمنَيتها توَه ميديدة و شهور...
برَه ربَي يقوَي سعدها تكبر و تنسى و تمشي و تغور...
أختو...
ايييه يمَميمتي محلاها فيها خلَي تغور ...
قتلو خويا لوَح علينا منها انا و رويجلي هاتو نركَحولك الأمور...
هاو الممَو عندي هاو الدَبارة و الشَطارة نلقَنوهالو سطور سطور...
أختو ...
جبتلو كعيبة عندي مدَة ملَي عرَفتو عليها ...
كان ياخذها و تخطفلوفرصة يا مبنَها و يا محلاها...
ايه ما صاب يطربق على وخَيَ المنداف و يحصل في الشَكاره ...
خلَي رويجلي يرضى عليَه و يعطيني البشاره...
و يخلَيني في داري و نقعد لدارو عماره..
أختو ...
والأخرى حلَها عندي و اللَه مانورَيها كالمصفاره ...
تحبَ تغمَ عليه و تولَينا نار حريقة و شراره...
ساهل برشة نعمللها شوهة و نحلَ حوباره...
في شريان الشَبوك راني معلَمة راني طيَاره...
أمَو... و أختو ...
على الضَالين أمين هاذي أحسن دباره ...
نحنا ناس نظاف شبعانين بالطَيبة و شبعانين بالطَهاره ...
نخليو الدَيارو ناديو يا سيدي بو جباره ...
اجبر الخواطر و أسدل السَتاره ...
الولد مخَو هشيَش لا يفقه و لا يدلَ اشاره...
عمرو ما يفيق الَلي أحنا ناس غدَاره...
و نهارة اللَي يفيق و تخلى عليه هاتو يشدَ باب الحاره ...
يلبس كشطة و يعلَق في رقبتو قنديل باب مناره...
لا عندو حرارة روح و لا همَة ولا تهمَو خساره ...
نارو يطفَيها بالما وما تبرد وما يعطي أماره...
أمَو ...
عقبة في الثَنيَه ...
أختو ...
شمطاء حرايميَه ...
دخَلوها بعضها بالشويَه بالشويَه...
و ركَبوا المشاهد بسلاسة بديهيَه...
مش أوَل مرَة في التَاريخ يعملو كيما العملة هاذيَه...
و وخيَنا من كثر الخوف الَي يوقَف المخَ قبل ما يجرَي الجوف قعد كيما الطَرطور ...
لا ويلو يركب عالموطور ... و لا ويلو يحبَ يسوق التَركتور ...
أمَا اللَي يسمع كلام الغير الفارغ و يستَف مخَو بالسَيمان و الشَرشور...
و يخلَي هاذي و هاذي تدبَر فيه و تمشَيلو الأمور...
يعدَي حياة عمرو هايم يدور...
لا ينجَم يخلط عالموطور ولا يملالو عينو التَركتور...
لله ما أتعسه من شعور...
أمَا يستاهلو كلَ ما ينالهم من شرور...
الزَمان دوَار و في الدَنيا ابن ادم يشقَ برور و بحور...
أمَا اللَي يعمل يلقى مهما كان الوقت دهور ...
زعمة شكون الغالط و شكون اللَي بدا ملَول...
أمَو ... ولاَ أختو... و لاَ هوَه المسؤول ...
وئام عاشور
Website Design Brisbane
Tags: