ومنسيتش
Rim Wrak - ريم ورقو مازالو خدودك مالحشمة يحمارو
و مازالو النجوم بين فصوص عينيك يبانو
و مازالو الطبة في دواك يختارو
و مازلت نحب نبعد قبل ماوراق الشجرة يطيحو و يصفارو
بحرك غارق و صعيب يبوح بأسرارو
بين الموج مخبي اخبارو
حلفت نكبر و ننسى
و حفرت قبر و رميتك فيه و الغصة
و كبرت و نسيت ننسى و تعلمت نهجي الحروف و نددش و نكتب كلمات ، باقي نخاف مالحلمات
و كبرت و خطي باقي شامت و حالف عالسطر و مازال بين اربعة حروف و شبرين يترهوج
شايب على عكاز خشب يتبع في جرة خطاويك و بقايع دم ايديك و على خيالك يلوج
و بين الزنقة و اختها حرف من اسمك على حيط معوج ينقش
زناقي تمشي و تضياق و النفس تقطع و قريب يدهش
و مازالو خدودك مالحشمة يحمارو
و النجمة غطاتها الغيمة
و مشات السكرة و معاها الفرحة و التبسيمة
و الصنعة المشومة لي مانجمت نحيها
و الغناية لي ستانست نغنيها
و الڤمرة لي غدرت بيها
و قلبت الدنيا سافيها على عاليها
و مشى فيبالي بش ننسى
اما النجمة طفات و الشمس تڤات
و وراق الشجرة طاحو
و كبرت و مشى فيبالي بش ننسى
ومنسيتش
ريم ورق
Website Design Brisbane