أنا كحله و ظفيرتي  مشبشبه مشتشته  مظفوره بيديه المجنونه ما يسيبها كان ما يريّشها و يبربشها ، ظفيرتي كحله في الصباح على ظهري مرميّه و في العشيه على جنبي ملويّه، كل

ليله  تجي عليها عيني الكحله تضحك و تزهى و تغزرللسماء الكحله تشوفها تحلى، كل ليله سقف بيتي يعلى يفوت علو لجبال و شويّه و شويّتين يلمس السما يسقسيلي عل الأحوال، يبدالي بنجومي نعشق فيهم بعيوني ندغدغهم بجفوني نسمع منهم ضحكات و بين الضحكات روايات

روايات و حكايات ،حكايات قديمه و جديده،عندهم مديده سكنولي في البال

ملي كان ملتقانا كل ليله صار جهار نهار

مش مسيّبين و زادو عليّا بالخنّار

يشوفو فيه كل دقيقه في النهار،

دنيتي مافيها عمار،هكّا صارحوني،

عاتبوني علاش نسلّم و نضحك في وجه الجار و دوب ما يخطف الدوره يحكي للجار و الأجوار ملاّ عايقه من بار لبار

تعطي فيه و مش هاممها العار،تي أيييه مالها كان بنت حرام ،نخرج م الزنقه نطلع في الكار، نحسّ في بدنو لصقني و لبسني إستلبست و شعلت فيّا النار كيفاش الكار فارغه وسطها و

أجنابها و السيّد قاسم عليّا بلاصه بحذا باب من بيبانها دزّيتو و سبّيتو على راسو عطيتو

لامو عليّا و دارو فيّا هانوني و سبّوها، الأم إلّي لدّنيا جابتني و ما حاذتني

سبّيتها معاهم سكتو مصدومين توا زعما زعما مش فاهمين ،طفله تسب أمها !! وين إلي يحيّر و شنوا إلي يبهّت ،مش دارين إلي سبّوها غريبه عليّا قبل ما تكون غريبه عليهم!مش عارفين إلّي هي لاتنجّم تأثّر لا فيّا لا فيهم ،وصلت الكار للمحطّه و الوجوه الكل تقلبت ولّت خاطيها ،

تحل الباب هبطت نزرب ما نحبش نتلفّت دموعي عزيزه عليّا و نعاني إلي فيا خطفتني مل الجوجمه إلّي تمكّنت بيّا مرا كبست عليّا و كركرتني تمسح في الجرّه و تحت جناحها خبّتني, من جهنّم عيشوني فيها دكوّني حطب نشعّل جواجيها ،هاربه بيّا تجري و تجرّي فيّا حسّتني و فكّتني من عذابهم نقذتني،علاش الكذب هل مرا ساكنتني ما نجمتش نفارقها و ما تنجمّش تفارقني، حبيتّها تكونلي الأم إلي جابتني

في كل لمسه و همسه ڨلبي يرفرف

يحنّ و في حضنها نحب نترما علاها و راسي عندها نكن

عندي القوة بش نعارك الدنيا بناسها و وحوشها و سماها و غيومها و جبالها و بحورها و نجري و نڨز عندها و نتخبّا في شورها

نشم ريحتها و نتفس هواها و نروا من كفوف يداها و نحلف لا نمشي من حذاها،

خيييت عليها!!!!  بنت حرام وشّمتني صبيّه منسيّه خلّتني نقمت عليها و عالدنيا إلي حبستني فيها ،لا نحب نشوفها لا ندور باها لا نسأل علاها لا يهمني فيها لا نمسح دموع عينيها لا نڨول ميمتي شباها لا نسمع منها حكايتها وإلّي بيها و الشّي إلي صار فيها و الهم إلي تعدا عليها ،،،،

كيما خلّتني نخلاّها ،شي ما يفهّمني و شي ما يبردلي ڨلبي وحد ما ينجم يصيب أسباب همّي و غمّي،

لا نلوم بابا و لا خويا و لا عميّ،

هي سبب دركي هي للدنيا طيشتني ،

جواب مسوڨر بعثتني،

لا رضعتني لا سكتتني لا ددشتني لا لعبتني لا وكلتني لا شربتني

لا غطتني لا دفّتني

لا حملتني لا باستني

لا كبّرتني لا نصحتني

لا حنّت عليا لا خافت عليا مل الخلطه لا نصحتني نبعد عل الغلطه

لا عيطت عليا لا ڨتلي راك بش تجيبلي جلطه لا فيّقتني إلي زلڨه بفلڨه

عشرين عام تعدو فلڨه وراء فلڨه

تسميت بنت حرام و عشت مقتوله مالفرحه محرومه،

الليله السقف ماعلاش و النجوم مفمّاش

لازم نطير و ماعدش نحير نعرف علاش و كيفاش ،

الحبل ظهرلي قصير خفت  الطريق بين السقف و السّماء يكون طويل

و ما نخلطش و نبقا بين دنيتين دنيا رفضتها و قتلتها و دنيا فيها نطير،رسمهالي سنين و بقا يستنّا فيّا  في  و ظفيرتي بين يديّا ...