كي تجيِ تشوف بالحق كان الدّموع تردك تو نبكي عليك مع سنيني لي فاتت بقية عمري اليّ مازال ..

خاطرني انا لي نعيش فيها توو مش مرتاحه فيها ، غصّبتها علياّ .. فرضتها بحتمية الوقت .

الوقتْ ، خلاّك تتباها بجفاك و تزيد تضحك و انا وحدي نغردْ كالطير المكسور في سماك ..

شكون علياّ علاّك و هزلك مقامك و حطك عرش على. وطاكْ ؟

و كان تردّك ليا ليام تو نبيع عليك الرخيص و الغالي و انتَ حتى كان تنكر تعرف بين الناّس مقامي ..

تتفكر كي تجيني متزولف لاك بارد لاك حامي .. تهتري بإسمي تشتهي تشڨ  حرامي و تترمى كالولد ڨداّمي ..

تتفكر المستور و لي مخبيه الزمان المغبور .. هو هو في جاشي ڨادي صامور ..

انا الشجرة الخضرى و يڨولو علياّ بور ..

ضاربتني الشمس تخمرت ثماري و شرّبت من يديّ زراعة مخازن داري .. سترتك نجري بيك و نداري لا يشلقو بيك الحزارة و نولي ل بنية لي ب غلّتها خمر فلان و تهز كلام بين لوذان و زادو حديث و كل جملة عليها أوزان..

و انا لتوة نڨول كان الدموع تردّك نبكي عليك لين تجي ..

مكسي و عريان ، حافي ڨرسان .. راكب خيلك فارس العربان ..

تاجي انتً  و انا وردة الوديانْ ..

شكون فياّ نساك و علمك الهجر ڨساّك ؟

ملعون كي هاك الشجرة لي عيات تستر فالكَرةْ و الكَرة ..

مهدود مخك تاعب ممحون ، منيّ هارب مفجوعْ و الڨلب يعطيه الوبى شاهي الرجوع ، مخلوڨ  ليا ، ممروج ..

شكون علاّك يا أرض و سما و هوا و ما .. ؟

حاشاك كان الدموع تردك .. انتَ لي فيك ما يخفاش لاك أنس لا جان لا بايع الطرح لا شاري و صدرك معريّ. ..