لا ضحكت لا لعبت كي ندادي من صغرتي ربطوني بالرسميات و بهم الدنيا و غمها .. كبروني على صغر سني .. حياتي لكلها وجايع لكلها فجايع .. قصولي جوانحي و قالولي طير .. خنقوني و قالولي احلم .. حبسوني و قالولي احكي ..

من صغرتي سطرولي حياتي .. يزي ما تعملش هكا .. اعمل هكا .. البس هكا .. قتلو فيا طفولتي حتى مراهقتي عشتهاش كيما اي بنية .. اول حب حبيتو كانلي عذاب لتوة نقاسي منو ..

حلمت برشا و نسيت واقعي نسيت لي انا محكوم فيا لي انا كالماريونات .. حبيت و نسيت لي انا يلزمنيش نحب .. توة فاتت سنين و كبرت و لتوة ما نسيت طرايح كليت في صغري و ليالي نباتهم بدموعي ..

كنت نبكي نبكي لين يهزني النوم و حد ما يجي يرضيني .. نقوم الصباح و ننسى لي صار البارح .. في مراهقتي كنت نبات نبكي كيف كيف اما كنت الصباح نقوم مكشبرة بلي نحاول نخلق ضحكة نجمش .. توة لا طفولة لا مراهقة الدنيا كبرتني اما خلاتلي سيكاتريس في قلبي وجيعة نعاني فيها .