صحّة وفرحة
Raouaa Khouildi - روعة الخويلديصحّة وفرحة ..
سْتحفظ عليه بركة مالغبرة ..
و سْقيه كلّ صباح بتبسيمة
مايحبّش الوجه المكشبرْ
يحبّ لمْرا الحنينة ..
صحّة وفرحة ..
صبرت ونلتْ ..
قدّاش قعدت تستنّى فيه بش يكبر ؟ قدّاش قطعت من كيلوماتر بش ليه وصلت ؟
سامحني بطيت عليكْ
وقت إلّي لمّيتو مالقاعْ مازال مايعرفش يحلّ عينيهْ
عدّيت ليالي نددّشْ بيهْ
وْ خذالي برشة سبلاتْ من شعري وْ ردّهم بيُضْ
برْغم لّي الوقت معاه يتعدّى في رمشة عين مايتعّبْ، كي حلاوة الكتبْ
سامحني بطيت عليكْ ..
حبّيتو يجيك كاملْ وعينيه كي الصّيدْ
حبّيتو كي ياقف قدّامك يعرف يقرى منڨالة لمْحبّة
كي تسألو عالوقت، يجاوبك الكبيرة في القلب والرّيشة الصّغيرة في الكبدة
علّمتو يربّي الكبدة ..
صحّة وفرحة ..
إستحفظ عليه بركة مالغبرة
و سْقيه كلّ صباح بكليمة حلوّة
ماتكُونش دُوّة ..
مرّات في عوض تشويش لْفمّ
يحبّ الغناء ..
غنّيلُو .. كيما تغنّي موجة البحر وكيما يغنّي بين أوراق الشّجر لْهوا ..
صحّة وفرحة
الحاجة إلّي خاطْـــــيتّكْ
كان نهار وإنتي تدّحنسْ عليه .. طاح وتفرّتْ وخرجت أنا من بين ظلوعُو .. ماتتّرعبشْ
ولا لا لا .. مانيشْ حاسْدتّكْ
نْزعتُو من لحمي وقتلك تفضّلْ .. وبالك يجي نهار ويْحبّكْ ويولّي ليكْ يفضفضْ
وْصحّة وفرحة ..
ماحْسبتُو يولّي هكّا أوّل مافقّسْ مالعضمة
ليلتها غسلتُو بماء لْوردْ
وزرعت وسطُو زيتونة تظلّل على قلبُو ومحيتْ منّو كل حاجة خايبة بماء لْفرقْ
ليلتها تحلّت عينُو ..
وْفرّغلي صندوقُو الخايب إلّي تكتبْ على جبينُو ..
ليلتها عاود حيَا ..
وْ علّمني قلّة الحياءْ
وْ حبّينا بعضنا لسابع سماءْ
وْ بكيـــــتْ وقت إلّي الرّيشة الصّغيرة هزّها لْهواء .. وطاحت في ڨلتة ماءْ ..
تكسّرتْ ..
صحّة وفرحة .. وْ سامحني كان خلّيتك تستنّى وْ بطيت عليكْ
حبّيت كي تجي في ثنيّتُو تلقاه كاملْ وعينيهْ كالصّيدْ
وْ سامحني كان سألتو على وقت لْمحبّة
وجاوبك الكبيرة في القلبْ والرّيشة الصّغيرة مشات من هاك
المُدّة.
روعة خويلدي
Website Design Brisbane