_الحب هو أساس العيشة متاعنا

_ساس خايخ !

_أما خير ولا قصر ظلما

_يضوا بالعشرة

_أناهي عشرة ، كيفاش تحب تكون فما عشرة بين زوز ما يحبوش بعضهم

_العشرة تجيب الحب

_ الحب هو لي يجيب العشرة موش العكس ..

_تو يجي نهار وتفهم

_شنوا تحبني نفهم

_يلزمك تفهم لي الحب متاعك ماعندو وين يوصلك ، حط عقلك في راسك و خدم مخك  شوية و يزي بلا تبهليل

_معناها انت عشت مع جدي أحلى عيشة كيف ختارهولك بوك!!!!

_هذيكا حكاية أخرى ، صحيح هو كان صعيب أما عمري ما ننسى عشرة أكثر من ستين سنا .

_صحيت ..شفت ولا لا إنت عمرك ماك بش تنسى كل طريحة عطاهالك اما تنجم تنسا  الحاجات الباهية لي عملهملك خاطرك في الأصل ما تحبوش ، هو حاحة تفرضت عليك و تأقلمت

معاها و كهو

_حتى انت بنيْتي كان ماكش بش تنسى هالحب لي تحكي عليه راهو بش تتفرض عليك برشا حاجات ، رد بالك ..

_حاجات كيما شنوا ؟..

_عندك الحق مزلت ما تعرفش بوك كي يتغشش

_علاش موش انت  قتلي  لي بابا و امي كانو يحبوا بعضهم برشا

_أي هوكا حبوا بعضهم و في اللخر طلقوا ، وين وصلهم الحب متاعهم !!كان  للتمرميد في المحاكم

_موش الحب متاعهم لي وصلهم لهاك المواصل .. العادات و التقاليد التافهة و هاجس وريث العيلة هو لي خلاهم يتفارقو

_أما في لخر تفارقو بعد ما حبو بعضهم هاك الحب الكل ، كان هما حبهم ما وصلهمش انت حبك بش يوصلك !؟

_أنا و هما مش كيف كيف .. حبهم كان ضعيف ، ما نجموش يحطوا الايد في الإيد و يوقفو قدام الريح ، في أول نسمة سيبو إيدين بعضهم و كل واحد هرب من لاخر يلوج في مصلحتو.

_علاخاطر هاذيكا الدنيا كل واحد يلوج في مصلحتو قبل الناس الكل .. حتى انتوما تو تشوف كيفاش في اول مشكلة كل واحد بش يهرب و يلوج على مصلحتو

_أي أي شفت ...

_معناها عندي الحق !

_شفت كيفاش أنا سلمت و قلت يزيني تعبت فك عليا مالمشاكل مانيش ناقصة ، أما هو زاد كبّش فياهو ماخلانيش  و ما تهنا إلا ما مسحلي دمعتي و رجعني نضحك .. شفت أيييه شفت

لي حبنا أقوى من كل شي!