تعــالى
Dhouha Talbi - ضحى الطالبيتعالى نحكيلك عاللي بيا
عالحيرة و الخوف عليك
و عالايامات اللي تتعدا بلا بيك
بلا ضحكتك البنينة و دموع الفرحة كي نتقابلو بعد غيبة
طويلة ، قصيرة ، ترجعلي و برشا حنية في لمسة ايديك
تسكتني و تقلي يزي بلا تخرنين و خلينا نهار زاهين
تعالى نسمعك الكلام اللي تكتب عليك
و نبعدك ع وضع البلاد و الكراسي اللي تتعارك
و انت قدام التلفزة ساكت باهت ،مشغشب و تقلي شنوا الحل؟
و انا نقلك اخطانا من الظلم القهر و الكلام اللي بلا فايدة
و تعالى نحكيلك
قداه توحشتك
و قداه النهارات في غيابك ظلمة
وانت تخمم في البلاد و انا نخمم فيك
ما نباتش نرقد
نكنبس و بشوي تكيتك
نبعثلك مرسول و تعال نتقابلو في المدينة
تعالى ايدك في ايدي
ما تفلتنيش
تشممني الورد و تلبسني الفل
و قداه مواتيك يا ليلا تقلي
نتبسم ، نحشم و ما نلقا ما نقول
نكملو نتمشو هاهي ريحة البخور القرنفل و العنبر اتفوح
و خلي عاد المقروض كي نقسموه على ثنين
و أنا نحب نزيد تخطفها من فمك و توكلني
تعالى نقعدو قدام الجامع و كاس تاي في ايدينا يشهد علينا
تعالى نفرحوا ، نسلفيو و ما نسكتوش
بعد هاكي الغيبة للظلمة نهرو و أمي تكلم و تعاود
تهز عليها و تقلها تهنا عليها في عينيا بنتك
تعالى نبعدو عالناس و الكلام الفارغ
و نعملو في البحر ثنية
نشقوها و إيدك في إيديا
تعالى نشتحو في الشارع
و خلي يقولو هبلوا
تعالى ندورك لبلاد زنقة زنقة زنقة
تعالي نتمشو تحت المطر و نغنيو و مانتعبوش
تعالالي نتفاهموا ما نبعدوش ، مانتفرقوش
تعالى نعيشو و مولاها ربي !
ضحى الطالبي
Website Design Brisbane