الفرحة مسروقة
Syrine & Chadha Khlifi - سيرين & شذى خليفيالشعر المشبشب
على الكتف مهدود
والعينين السود
و غزرة من غير حدود
و صوتي عالي و راسي مرفوع
و قلبي الموجوع
و على الخدين دموع
و صغري الضايع
و كثرة الوجايع
و حقي المنهوب
و حلمي المسلوب
و حالفة مانتوب
و ما نتبع وصاية جدود
____
نا هي السمراء و الشعر مشبشب .. قلت تو تضحك الدنيا و ناقف قد منطيح
قلت حتئ كان الصوت تكتم الحقيقة محال تضيع
قلت نا قوية نا حرة نا مڨدية و عمري لا نميح ..
قلت هكا و في وجه العديان نبكي مرة و مرات نصيح
الدنيا هكا تعلمك ..
هكا تسنسك !
مش كي الميمة وين ما تشكي تحملك ..
سرحت بخيالاتي ..
عديت بالوحدة نجماتي و حكيتلهم على هم سنين و اصل حكاياتي ..
و حكيت علئ ايامات الصغر و تعالت بالشوي تنهيداتي ..
الوجايع متروكة
الفرحة مسروقة ..
_____
هكا الدنيا تعبك
قد ماتحاول تقوم تطيحك
و قد متحاول تقرب طيشك
و مش نا لي نتعب و نكل و نمل و نسلم
نا لي من فعايلي و اغلاطي نتعلم
نا المرا الحرة المنسية مع الحكايات الزمنية
و مش نا لي نأيس في وسط الثنية
نا لي نقرا و نكتب نسمع صوتي
نا لي نصيح و نغني ثوري احبك ان تثوري
و حتى كيف تغيب الشمس و يهبط الليل بظلامو
و الدنيا دحيس و الشمعة ذايبة تكوي فيا
و نبقى بيني و بين قلبي لي يوجع فيا
على ما تليعت و ذقت امرار و صار فيا
اما نعرف لي صباح زاهي يستنا فيا
و التعب مخلوف و الثنية مزالت طويلة
خاتر حتئ و الثنية شوك
و حتي كان وراهم رموك
و قالو العيب فيها و ما رحموك ..
شدوك في تركينة و لاموك
و عالشعر المشبشب حسدوك ..
و يا بنت الجبال و الريف نادوك
هدوك
حرموك
هزو سرقو منك و معطوك !
و بين الثنايا نسوك ..
سيرين خليفي & شذى خليفي
Website Design Brisbane